Rrëfimi i vërtetë rreth fshatit amerikan të të mallkuarve

Dadllitaun quhet "fshati i të mallkuarve" dhe është njëri ndër "qytetet fantazma" më të njohur në Amerikë

Dadllitaun është një "qytet-fantazmë", i lokalizuar në Konektikatin veriperëndimor, në kuadër të qytetit Kornuall. Shumë ngjarje të pashpjegueshme, zhdukje misterioze dhe pamje të fantazmave janë raportuar në këtë qytet të vogël. Sipas legjendës lokale, themeluesit e Dadllitaunit ishin pasardhës të Edmund Dudley-it, një fisniku anglez, të cilit i ishte prerë koka për tradhti, gjatë sundimit të mbretit Henry VII. Që nga ai moment, familja Dudley ishte mallkuar, mallkim i cili i ndoqi ata edhe përtej Atlantikut, në Amerikë. Emri Dadllitaun nuk dihet kur iu dha një pjese të Kornuallit, ku jetonin disa pjesëtarë të kësaj familjeje.

Mallkimi Rrëfimi rreth mallkimit i ka rrënjët te legjenda, e cila thotë se, për shkak të mallkimit të familjes së tyre, njëri nga vëllezërit Dudley u çmend. Nga ngjarjet e tjera të çuditshme, rrufeja kishte vrarë një grua nga kjo familje, derisa ishte në shtëpinë e saj. Edhe disa banorë të tjerë të Dadllitaunit thuhet të jenë çmendur, derisa dy gra, zonja Greeley, e njohur më mirë me emrin Mary Cheney dhe Harriet Clarke, thuhet ta kenë varë veten në Dadllitaun në vitin 1872, ku njëra prej tyre kishte raportuar se kishte parë djaj para se të vdiste. Pas Luftës civile, Dadllitaun ngadalë u bë qytet-fantazmë. Banorët ishin larguar në kërkim të vendeve më të mira, ku kishin qasje ndaj më shumë gjërave.

Por, John Brophy kishte vendosur që, bashkë me familje, të qëndronte aty edhe pasi që të gjithë të tjerët ishin larguar. Ky veprim u tregua të ishte gabim fatal për të. Për vetëm pak muaj, tërë jeta e Brophy-t ndryshoi. Gruaja e tij vdiq dhe, menjëherë pas funeralit, dy fëmijët e tij u zhdukën në mal. Nuk dihet sesi shtëpia e tij mori flakën dhe, në fund, u zhduk edhe vet Brophy. Pas vdekjes së banorit të fundit, Dr. Clarke bleu një copë të madhe të tokës në atë zonë dhe, zyrtarisht, u bë pronar i Dadllitaunit. Legjenda thotë se ai e kishte lënë gruan e tij të qëndronte aty për disa ditë, por kur ishte kthyer e kishte gjetur atë tërësisht të çmendur. Pasi që ankohej se kishte parë krijesa të çuditshme në mal, ajo e vrau veten në shtëpinë e saj.


Mallkimi vazhdon?! Pas disa vitesh, ai u martua sërish dhe ndërtoi një shtëpi të re për nusen e tij. Bashkë me një grup shokësh të tij, çifti formoi Asociacionin "Dark Entry Forest Association". Meqë në tërë vendin ishin duke u shkatërruar pyjet, ata shpresonin që këtë ta pengonin në vendin e tyre. Clarke dhe gruaja e tij e dytë vdiqën gjatë viteve 1940, por pasardhësit e tyre vazhdojnë që të jetojnë aty afër. Tani, "Dark Entry Forest Association" është në pronësi të tokës dhe hyrja më nuk lejohet aty. Ekziston një vërejtje e vendosur nga policia e Konektikatit, ku thuhet: Ata që shkojnë, apo tentojnë që të shkojnë në Dadllitaun, do të arrestohen për kalim të palejueshëm dhe/ose për parking. Dënimi fillon nga 75 dollarë për person dhe ka tendencë që të rritet.

 (Kosova Sot)

Ndalohen komentet që përmbajnë gjuhë denigruese dhe fjalë ofenduese ndaj individëve dhe ndaj grupeve specifike, si dhe komentimet që s'kanë të bëjnë me artikullin. Reporteri.net mban të drejtën e fshirjes së komenteve që thyejnë rregullat e komunikimit.