×
  • Lajme
  • Botë

    Erdogan: Marrëdhëniet me SHBA nuk po shkojnë në drejtimin e duhur

    Reporteri
    23 Shtator 2021 | 23:41

    Presidenti i Turqisë, Recep Tayyip Erdogan, tha më 23 shtator se raportet e vendit të tij me SHBA-në nuk po shkojnë në drejtim të duhur.


    Sipas tij, raportet me administratën e presidentit amerikan, Joe Biden, nuk kishin “nisur mirë”.

    Erdogan u dërgoi mesazh aleatëve të NATO-s, përfshirë Shtetet e Bashkuara se, nëse ato nuk e ndihmojnë Turqinë në aspektin e mbrojtjes, atëherë vendi i tij do të kthehet në drejtim tjetër.

    Gazeta turke Haberturk citoi Erdoganin të ketë thënë se problemet e kanë bazën te zemërimi i SHBA-së pasi Turqia bleu sistemet e avancuara raketore S-400 nga Rusia.

    “Sa i takon raporteve turko-amerikane nuk mund të them se po zhvillohet një proces i shëndetshëm”, u tha presidenti turk gazetarëve kur doli nga debati i Asamblesë së Përgjithshme të OKB-së në Nju Jork.

    Administrata e ish-presidentit amerikan, Donald Trump, pati vendosur sanksione ndaj industrisë së mbrojtjes turke për shkak të blerjes së sistemit rus.

    Disa ekspertë vlerësojnë se sistemi S-400 përbën rrezik për avionët F-35 të NATO-s dhe SHBA-së.

    Turqia ka qenë partnere në prodhimin e tyre si dhe kishte blerë disa prej tyre.

    “Kemi blerë F-35, kemi paguar 1.4 miliardë dollarë dhe ato nuk na janë dhënë”, tha Erdogan, duke shtuar se kjo është çështja e parë që duhet të zgjidhet nga Shtetet e Bashkuara.

    Presidenti amerikan, Joe Biden, në anën tjetër e ka hidhëruar Erdoganin pasi e ka njohur si gjenocid vrasjen e armenëve më 1915 nga ana e Perandorisë Osmane si dhe ka kritikuar Turqinë për mosrespektim të të drejtave të njeriut.

    Kritikat amerikane janë shtuar pasi Turqia u largua nga Konventa e Stambollit, që synon mbrojtjen e grave nga dhuna.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!