Një panel i pavarur ekspertësh, i krijuar me kërkesë të disa vendeve anëtare të OBSH-së, tha të martën se komiteti për emergjencat i organizatës botërore u mblodh më 22 janar të vitit të shkuar kur vatrat e infeksionit kishin filluar të zgjeroheshin përtej Kinës.

Ndërkohë gjendja e emergjencës globale u pranua më shumë se një javë më vonë, dhe vetëm më 11 mars 2020, u konfirmua edhe pandemia.

“Është e qartë se Kina duhej t’i kishte aplikuar më rigorozisht masat për mbrojtjen e shëndetit publik nëpërmjet autoriteteve shëndetësore lokale dhe atyre kombëtare,” deklaroi grupi i ekspertëve të pavarur, i udhëhequr nga ish-kryeministra dhe ish-presidentë.

Në dokumentin që prezantuan të martën para OBSH-së, paneli i pavarur tha se Kina dhe Organizata e Shëndetësisë patën rolin e tyre, por përgjegjësitë u takojnë edhe shteteve të veçanta që neglizhuan masat kufizuese megjithëse po e shihnin situatën serioze me Covid-19.

Pekini nuk i pranoi kritikat duke thënë se bëri më të mirën me informacionet që kishte në atë kohë.

“Si vendi i parë që dhamë alarmin për pandeminë, ne morëm masa të shpejta dhe vendimtare. Mendoj se për çështjet e shëndetit publik nuk ka kurrë përpjekje të përsosura, vetëm përpjekje të mira. Ne, SHBA-ja, Britania, Japonia dhe çdo vend mund të bëjë më mirë,” tha Hua Chunying, zëdhënësja e Ministrisë së Jashtme.

Virusi i ri vdekjeprurës u zbulua në fundin e vitit 2019 në qytetin kinez të Wuhan, përpara se të shtrihej në gjithë planetin, duke vrarë mbi 2 milionë persona e duke goditur ekonominë globale.

Në harkun e një viti, infeksioni ka prekur gati 100 milionë njerëz, por ekspertët pranojnë se bilanci botëror si i vdekjeve, edhe i të infektuarve, është më i lartë dhe i gabuar që prej fillimit.