Tensionet me Iranin dhe Korenë e Veriut, dhe raportet tregtare SHBA-Japoni ishin fokusi i takimit që kryeministri japonez Shinzo Abe organizoi të hënën me të ftuarin e tij, presidentin Donald Trump. Dy palët konfirmuan vendosmërinë për ta forcuar më tej aleancën. Trump u prit edhe nga perandori i ri i vendit, Naruhito.

Japonia mund të luajë rol ndërmjetësues në konfliktin midis SHBA-së dhe Iranit që vazhdon prej muajsh.

Lajmi u konfirmua të hënën gjatë një takimi që kryeministri japonez Shinzo Abe organizoi me kreun e Shtëpisë së Bardhë, Donald Trump.

SHBA-ja, por më herët edhe Teherani, përsëritën se mbeten të gatshëm të hyjnë në bisedime pajtuese, dhe do të përpiqen të shmangin përshkallëzimin e situatës.

Presidenti Trump drejtoi një mesazh të ngjashëm pajtues edhe ndaj Koresë së Veriut, dhe shprehu besim se vendi do të përmbushë zotimet e dhëna më parë për çarmatimin e plotë bërthamor të gadishullit.

Fokusi i takimit të dy shtetarëve u fokusua edhe te forcimi i aleancës SHBA-Japoni.

Duke përmendur raportet tregtare, u njoftua se në muajin gusht do të bëhet publike një marrëveshje dypalëshe që pritet të adresojë edhe deficitin e lartë tregtar mes dy vendeve.

Japonia gjithashtu do të blejë më shumë avionë luftarakë të prodhuar në Amerikë, ndërsa dy aleatët u zotuan të dërgojnë së bashku astronautë për misione të ndryshme hapësinore.

Bisedimet dypalëshe që vijnë në kuadër të vizitës shtetërore katërditore të presidentit Trump në Japoni u paraprinë në fundjavë nga momente relaksuese sportive të dy delegacioneve.

Të hënën shefi i Shtëpisë së Bardhë, i shoqëruar nga zonja e tij Melania, u bë gjithashtu i pari lider i huaj që pritet nga perandori i ri i Japonisë, Naruhito.

Takimi në pallatin perandorak u vlerësua si nder i madh nga të dyja palët, ndërsa ditën e martë përpara largimit Presidenti amerikan do të vizitojë një bazë ushtarake të vendit të tij në Japoni.