Shtetet e Bashkuara kanë thënë se do ta vendosin regjimin e vizave ndaj zyrtarëve kinezë që akuzohen për përfshirje në shtypjen e komunitetit mysliman në Kinë.
Ky vendim erdhi pas një vendimi tjetër të ditës së hënë për t’i vendosur në listën e zezë 28 kompani dhe agjenci qeveritare të Kinës, të cilat janë të lidhura me keqtrajtimin e pakicës myslimane në rajonin e skajshëm perëndimor të Xinjiang-ut.
Sekretari amerikan i shtetit, Mike Pomepo, ka thënë se qeveria kineze e ka nisur një fushatë shumë shtypëse ndaj ujgurëve dhe kazakëve, por Kina i ka mohuar këto akuza, duke thënë se ato janë të pabaza, shkruan “BBC”, transmeton Gazeta Express.
Përmes një deklarate, Pompeo e akuzoi kinën për një varg keqtrajtimesh që ua ka bërë komuniteteve myslimane të ujgurëve, kazakëve, kirgizëve dhe grupeve të tjera të pakicave.
Sipas tij, në mesin e keqtrajtimeve përfshihen ndalimi në kampe, mbikëqyrja e vazhdueshme me pajisje të teknologjisë së lartë, kontrollimi i rreptë i qëndrimeve për identitetin kulturor dhe fetar dhe kthimi i dhunshëm i personave që gjenden jashtë vendit.
Regjimi i vizave pritet të zbatohet ndaj zyrtarëve të qeverisë kineze, anëtarëve të Partisë Komuniste të Kinës si dhe ndaj anëtarëve të familjeve të tyre.