Reporteri.net në rrjetet sociale

Nacionale

Historia tragjike e Pashke Bekajt nga Klina: Një police dhe tre dashnorë

Publikuar

më:

Një histori dashurie e një policeje, me tre kolegë të saj, të martuar, ka përfunduar me vetëvrasje. Ngjarja kishte ndodhur në gusht të vitit 2014. Pashke Bekaj u gjet e vrarë me një plumb në kokë, në ditën e Bajramit. Familja pretendon ende se bëhet fjalë për vrasje, e jo vetëvrasje. Dashnorët e saj, tre policët Besim Boja, Fatmir Gashi dhe Ardian Toplana akuzohen se nxiten që ish-dashura e tyre t’ia shkrepë vetes plumbin me armen e saj.

 

“Jeta jeme ka përfunduar sepse Fatmiri dhe Besimi e kanë ba planin e vet. Gj. ruaju se këta janë kriminela dhe kanë me të vra”. Ky është komunikimi i fundit i Pashke Bekaj me Gj.C., më pak se dy orë para se pjesëtarja e Policisë së Kosovës të gjendej e vdekur në shtëpinë e vet në Krushevë të Madhe të Klinës, më 29 korrik 2014.

 

Raportet zyrtare konstatuan se policja Pashke Bekaj u vetëvra, porse familja e saj kurrë nuk e pranoi një gjë të tillë, duke vazhduar insistimet se ajo u vra, shkruan Gazeta Express.

 

Dy vite më vonë, Prokuroria Themelore e Pejës ka ngritur aktakuzë për tre kolegë të saj, me të cilët policja e vrarë edhe kishte qenë në lidhje dashurie në periudha të ndryshme.

 

Besim Boja (46), Fatmir Gashi (39) dhe Ardian Toplana (43), të tre pjesëtarë të Policisë së Kosovës, qysh më 22 gusht 2016 po akuzohen se shtynë në vetëvrasje ish të dashurën e tyre.

 

Gjykimi i rastit po vazhdon ende të trajtohet në Deçan, në degën e Gjykatës Themelore të Pejës.

 

Aktakuza: Gjithçka nisi në vitin 2006

 

Polici 46 vjeçar nga Klina, Besim Boja, edhe pse i martuar në vitin 2006 kishte nisur një histori dashurie me kolegen e tij Pashke Beka. Boja dhe Beka, të dy ishin policë në stacionin policor të Klinës.

 

Por, më shumë sesa dashuri, lidhja e tyre, në aktakuzën e ngritur ndaj Bojajt dhe dy pjesëtarëve tjerë të Policisë për “shtytje dhe ndihmë në vetëvrasje”, përshkruhet si një histori dhune dhe kërcënimesh.

 

Megjithatë, ndonëse i martuar, Polici Besim Boja, në aktakuzë, thuhet se i kishte premtuar kurorëzim edhe policës së vetëvrarë.

 

“Gjatë lidhjes që ka pasur me të, i pandehuri e kishte maltretuar fizikisht të njëjtën në forma të ndryshme duke e rrahur, duke e frikësuar, duke i premtuar se do të martohet më të”, thuhet në aktakuzën e Prokurorisë Themelore të Pejës.

 

Këto pohime, vetë viktima i kishte deklaruar katër ditë para se të gjendej e vrarë me një plumb të revoles së saj zyrtare, në shtëpinë e saj, në ditën e Bajramit, në korrik të vitit 2014.

 

“E ndjera deklaron, diku para tre muajve, kishte ardhur i pandehuri Besim në Stacionin Policor në Klinë, diku rreth orës 21 ku të njëjtën e kishte goditur me shkelm në këmbë duke i thënë “pse nuk ma çel telefonin”, dhe i kishte kërkuar që t’ia kthej sendet si parfum, maica, etj.”, thuhet në aktakuzën që e ka siguruar Gazeta Express.

 

Detyrim për seks brenda stacionit të Policisë

 

Tre vite pas lidhjes më policin Boja, pjesëtarja e PK’së, Pashke Beka ishte detyruar të kryente marrëdhënie seksuale me një tjetër polic, thotë aktakuza. Prokuroria pretendon se i akuzuari tjetër Fatmir Gashi, duke qenë në dijeni për lidhjen mes policëve Boja-Beka, duke maltretuar psiqikisht dhe fizikisht e kishte detyruar Pashke Bekajn që të lidhej edhe me të.

 

Në deklaratën e saj të dhënë në Drejtorinë e Standardeve Profesionale të Policisë së Kosovës, vetëm 4 ditë para ditës kritike, Pashke Bekaj deklaron se derisa refuzonte të kishte marrëdhënie me kolegun e saj nga stacioni policor i Klinës, Fatmir Gashi i kishte shkuar dy herë tek shtëpia duke shtënë me armë afër dritares së shtëpisë.

 

“Po ashtu e sulmon fizikisht edhe në stacionin policor në Klinë. Dikur nga mesi i muajit maj 2014, duke e goditur me shuplakë duke i thënë “ti je kur*ë, ti je kur*ë”. Me ç’rast e njëjta jashtë vullnetit të saj detyrohet që të kryej marrëdhënie seksuale më të pandehurin Fatmir”, thuhet në aktakuzë.

 

Edhe për të akuzuarin Fatmir Gashi nga fshati Balincë e Klinës, aktakuza bën të ditur se është i martuar. Të njëjtin status civil, 39 vjeçari e kishte pasur edhe në kohen kur pretendohet se e ka detyruar policen tashmë të vdekur, të kryen marrëdhënie seksuale me të.

 

“Mashkulli i fundit” për policen e vdekur

 

Ardian Toplana, polici i tretë i akuzuar për nxitjen e vetëvrasjes së Pashke Bekaj, kishte vetëm pak muaj që ishte ndarë nga lidhja jashtëmartesore më policen viktimë.

 

Në aktakuzë, thuhet se 43 vjeçari, edhe pas ndarjes me policen Pashke Bekaj, në vitin 2014 i kërkonte asaj që të rifillojnë lidhjen e tyre.

 

“Nuk do të jesh e askujt, vetëm e imja”, “Mashkulli i fundit do të jem për ty”, ishin vetëm disa nga frazat e mesazheve që prokuroria përmend në aktakuzë, që polici i akuzuar Ardian Toplana ia kishte thënë ish -të dashurës së tij, e cila pak muaj më pas u vetëvra.

 

Gjatë asaj kohë, aktakuza potencon se Pashke Bekaj ishte duke u përpjekur që të lidhte martesë me Gj.C.

 

Me këtë të fundit, Pashke Bekaj kishte edhe komunikimin e fundit, në ditën kritike, shkruan Gazeta Express.

 

“Jeta jeme ka përfunduar sepse Fatmiri dhe Besimi e kanë ba planin e vet. Gj. ruaju se këta janë kriminela dhe kanë me të vra”, ka deklaruar, pas ngjarjes, në hetuesi Gj.C., burri me të cilin e ndjera po planifikonte martesën. Ketë komunikim Pashke Bekaj me dashnorin e saj e kishin pasur më pak se dy orë para se të gjendej e vrarë me një plumb në kokë, më 29 korrik 2014.

 

Mesazhet kërcënuese që gjeti prokuroria

 

Prokuroria pretendon se deklaratën që Pashke Bekaj e ka dhënë në drejtori të standardeve, katër ditë para se të vetëvritej, faktohet nga disa SMS që janë gjetur në pajisjet e polices së vdekur dhe familjareve të saj.

 

“Unë kurgjë nuk takam ba, ani, mos harro se ti je kanë hala në punë, kur ka dal Zefi me Besën [vëllai i Pashke Bekes dhe gruaja e tij] me ec , ju kam shku mbrapa, mos harro se dikush po don mu vra, kra dije jam ba budall”, është një nga mesazhet kërcënuese ndaj viktimës, që posedon prokuroria, të dërguara nga numri i të akuzuarit Besim Boja.

 

“nëse kerri yt thehet në parkingun e Klinës apo dikun tjetër e ka thyer une. Nese dikush ka hyre në shtëpi tanë në Klinë kam hy une, nëse dikush e ka kall sobën tanë në Klinë e kam kall une, po të them ma q*fsh nanen ti mu, mos ta q*fsha une ty moj ku*vë. Ateher mi me marrë vesh kush une kam me kanë për ty”, është mesazhi tjetër që kishte pranuar Pashke Bekaj, pretendon prokuroria. Dërguesi: i akuzuari Fatmir Gashi.

 

Mohimi i të akuzuarve: Ishim në lidhje me Pashkën, por nuk e keqtrajtuam

 

Të tre ish-dashnorët policë të viktimës nuk e pranojnë se e kanë keqtrajtuar Pashke Bekajn, që si pasojë e dhunës që kishin ushtruar ndaj tyre, prokuroria pretendon se ajo u shty në vetëvrasje.

 

Besim Boja i ka thënë prokurorisë se më policen e ndjerë ka qenë katër vite në lidhje dashurie, nga viti 2006 deri në vitin 2010. Sipas tij, vetë Pashke Bekaj kishte ndërprerë romancën më të pa dhënë ndonjë sqarim, por pa marrë parasysh këtë Bojaj ka deklaruar se asnjëherë nuk e ka penguar që ajo të krijojë lidhje tjera.

 

As Fatmir Gashi, para drejtësisë, nuk ka pranuar se e ka detyruar policen e vetëvrarë që të kryejë marrëdhënie seksuale me të, siç ajo kishte deklaruar katër ditë para se të gjendej e vdekur. Por, ai thotë se ata kanë pasur një lidhje trivjeçare me policen Beka, nga viti 2011 deri në fillim të vitit 2014 – disa muaj para se të ndodhte vetëvrasja.

 

Për më tepër, i akuzuari Gashi në prokurori ka treguar një histori që kishte ndodhur në prill të vitit 2014, në të cilën e implikon të akuzuarin tjetër Ardian Toplanaj.

 

“Meqenëse kisha punuar natën dhe me interesonte që te marr pushim në telefonin e saj më është paraqitur Ardian Toplanaj dhe i njëjti më ka thënë “fol Fatmir Gashi”, dhe më ka thënë në këtë numër telefoni mos nuk dua ti kurrë me thirrë dhe më ka sharë në nënë”, ka deklaruar Fatmir Gashi para prokurorisë.

 

Por, se ka ndërhyrë në jetën e të ndjerës, e ka mohuar në prokurori i akuzuari Adrian Toplanaj. Megjithatë, ai ka pranuar se për gjashtë muaj ka qenë në lidhje me kolegen e tij police, me të cilën thotë se janë njohur nga viti 2000, në Akademinë Policore në Vushtrri.

 

Vëllai i Pashke Bekaj: Motra ime u vra

 

Zef Beka, vëllai i Pashkës, nuk mund të bindet se motra i është vetëvrarë. Ai thotë se është i sigurt se ajo u qëllua nga dikush që improvizoi si vetëvrasje krimin që ndodhi në shtëpinë e familjes së tij në Krushevë të Madhe.

 

“Jemi kërcënu prej vitit 2007. Prej atëherë jemi qyshtu”, thotë Beka, gjatë një bisede me Express, të enjten.

 

Tregon se ka humbur besimin në çdo instancë të drejtësisë. Për këtë, deklaron se nuk ka shkuar për të përcjellë asnjë seancë gjyqësore ndaj të akuzuarve për nxitje të vetëvrasjes së motrës së tij.

 

E pakuptimtë për të është edhe gjykimi i këtij rasti në Deçan, në degën e Gjykatës Themelore të Pejës.

 

“Motrën time e kanë vra”, thotë Zef Beka, derisa qëndron i ulur në njërën nga tavolinat e kafenesë që është pronë e tij, në Klinë.

Reporteri.net ne FB

Të gjitha materialet në këtë portal janë të mbrojtura me të drejta autoriale të Reporteri.net. © Copyright: 2017 Reporteri.net | Adresa: Sheshi "Nëna Terezë" – Kompleksi Avalla, Prishtinë. Email: [email protected]; [email protected]