A e keni ditur se 22 vjet më parë, gazetat britanike kishin raportuar për “vrasjen” e Baton Haxhiut?

Para 22 vjetësh, mediat britanike kishin raportuar se redaktori i atëhershëm i Kohës Ditore, Baton Haxhiu ishte vrarë në Prishtinë nga forcat serbe.


Gazeta “The Independent” kishte shkruar atë kohë se pasi Haxhiu kishte marrë pjesë në funeralin e avokatit të vrarë poashtu nga regjimi i Millosheviqit, Bajram Kelmendi ishte rrëmbyer nga forcat serbe dhe ishte vrarë.

“Pas pjesëmarrjes në funeralin e avokatit për të drejtat e njeriut të dielën, Bajram Kelmendi, Haxhiu u rrëmbye nga forcat serbe dhe u vra. Ishte e guximshme nga ana e tij që të merrte pjesë në funeralin e shokut të tij duke e ditur edhe vet se jeta e tij ishte në rrezik”, raportin mediat britanike para 22 vjetëve, shkruan Gazeta Express.

Tutje në raportimin për “vrasjen” e Baton Haxhiut gazetat britanike shkruanin se nuk dihet për fatin e gruas së tij dhe djalit të tij tre vjeçar, poashtu nuk dihet nëse trupi i Haxhiut është varrosur me ceremoni apo është diku buzë rrugës kryesore Prishtinë-Shkup.

Lajmin për “vdekjen” e tij, gazetari Baton Haxhiu e kishte rrëfyer pas luftës, ai ka treguar se teksa ishte i fshehur në një shtëpi në njërën prej lagjeve të Prishtinës dëgjoi lajmet e BBC-së në radio duke raportuar për “vrasjen” e këtij të fundit nga forcat serbe.