×
  • Lajme
  • Lajme

    Aliu: S’mund të ketë marrëdhënie normale me Serbinë pa vendosur reciprocitet

    Reporteri
    11 Maj 2021 | 21:46

    Ministri i Mjedisit, Planifikimit Hapësinor dhe Infrastrukturës, Liburn Aliu, tha se Qeveria Kurti do të vendosë masa të reciprocitetit me Serbinë, por kjo sipas tij, do të bëhet pas një analize ekonomike.


    “Reciprociteti do të jetë si masë karshi Serbisë për të vendosur një marrëdhënie normale me Serbinë, nuk mund të ketë marrëdhënie normale me Serbinë pa vendosur reciprocitet dhe një gjë e tillë është në synimin tonë dhe të Qeverisë e cila vendos me kohë”.

    “Ne e vendosim reciprocitetin pas një analize ekonomike dhe nga kjo analizë ne i vendosim masat karshi tyre duke e parë interesin e Kosovës në radhë të parë, si dhe interesat e shqiptarëve të Preshevës, Bujanocit dhe Medvegjës. Në shumë raste reciprociteti i ka dëmtuar edhe qytetarët e Preshevës, Bujanocit dhe Medvegjës.”

    “Pra, në këtë pikë edhe masat bllok mund të jenë të dëmshme, prandaj kërkohet një analizë për masat karshi Serbisë. Reciprociteti do të ndodhë patjetër. Edhe ai ekonomik edhe tregtar edhe krejt. Nuk mund të flas për parashikime, por e njoh Vetëvendosjen dhe në këtë pikë nuk do të ketë kompromis”, tha Aliu në Klan Kosova.

    “Ne do t’i marrim rekomandimet dhe mësimet, apo propozimet që vijnë nga miqtë, por të mos harrojmë që në fund vendimet merren në Qeverinë e Republikës së Kosovës. Kjo bën që ne t’i analizojmë çështjet konkrete, të mirat, dëmet dhe të vendosim, kur flasim për interesin e Kosovës mendojmë edhe për qytetarët e Medvegjës, Bujanocit dhe Preshevës”, shtoi Aliu.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!