Ambasadori gjerman, Christian Heldt, më datë 8 maj ka deklaruar në Drenas se nuk dihet se kur do të ndodhë liberalizimi i vizave, por që liberalizimi duhet të ndodhë.

Pra ai nuk ka dhënë asnjë datë se kur kosovarët mund të udhëtojnë lirshëm drejt perëndimit.

Por hezitimi i ambasadorit gjerman për mos dhënë data fare nuk po e pengon kryeministrin Ramush Haradinaj i cili po jep data të ndryshme.

Ndërsa kohë më parë premtoi se në qershor do hiqen vizat, më pas ai ndryshoi deklaratë ku më 8 maj para anëtarëve të partisë së tij tha se “shtatori është opcional me u marr vendimi që ne me lëvizë brenda një viti lirshëm”.

Por kryeministri tashmë ka dhënë një premtim tjetër për heqjen e vizave.

“Liberalizimi i vizave për qytetarët do të kryhet para fundit të këtij viti”, ka deklaruar sot Haradinaj gjatë takimit me strukturat e AAK-së në komunën e Vitisë, shkruan Reporteri.net.

Këtë premtim tha ai e bën duke e ndërlidhur edhe me mbështetjen që ministri i brendshëm gjerman i ka dhënë në një takim në Samitin e Berlinit.

“Ministri i Brendshëm gjerman në takimin me ta më ka thënë se jam për lieralizim të vizave dhe ata për menjëherë. Unë e di që para fundit të vitit po e kryejmë edhe këtë punë”, ka thënë Haradinaj.

Kujtojmë se premtimi i parë për vizat erdhi në vitin 2011 nga Hashim Thaçi që atë kohë ishte kryeministër. Ky i fundit nuk u ndal me premtim të njëjtë për disa vite, kurse pas tij premtime të njejta bën thuajse çdo politikan që erdhi në pushtet.

Ndërsa vitet po ecin e premtimet po mbesin veç të tilla, qytetarët në anën tjetër të zhgënjyer po braktisin në vijimësi vendin. /Reporteri.net/.