Presidenti i Shqipërisë, Bajram Begaj, ka pritur sot në takim ministren e Drejtësisë, Albulena Haxhiun.

Gjatë takimit, thuhet se Begaj ka përshëndetur nismat dhe reformat e ndërmarra nga Qeveria e Kosovës, teksa i ka vënë theks të veçantë fushës së drejtësisë, raporton gazeta online Reporteri.net.

“Është një proces i gjatë dhe aspak i lehtë, – u shpreh Begaj, duke theksuar se kryerja e reformave në interes të qytetarëve përmbush ëndrrën tonë si komb, atë të integrimit në Bashkimin Evropian”.

Po ashtu, bëhet e ditur se gjatë takimit u theksua bashkëpunimi mes institucioneve të Shqipërisë dhe atyre të Kosovës.

Tutje, Begaj ka vlerësuar se bashkëpunimi mes shqiptarëve ka një rol unik për stabilitetin, sigurinë dhe zhvillimin e qëndrueshëm.

“Shqipëria ka qenë dhe do të jetë gjithmonë aty për Kosovën”, u shpreh Begaj, i cili theksoi se Republika e Kosovës është një realitet i pakthyeshëm, pavarësisht çdo tentative dashakeqe që është e destinuar të dështojë.

Ndër të tjerash, Begaj rikonfirmoi angazhimin për rritjen e numrit të njohjeve të reja dhe për anëtarësimin e Kosovës në organizatat ndërkombëtare.

/Reporteri.net/.