×
  • Lajme
  • Botë

    ‘Bloomberg’ kërkon falje për publikimin e parakohshëm të lajmit mbi shkëmbimin e të burgosurve

    Reporteri
    05 Gusht 2024 | 20:56

    Agjencia e lajmeve ‘Bloomberg News’ kërkoi falje të hënën për publikimin e parakohshëm të artikullit javën e kaluar që zbuloi një shkëmbim të burgosurish në mes të Shteteve të Bashkuara dhe Rusisë. Njoftimi gjithashtu tha se organizata kishte disiplinuar punonjësit e përfshirë.

    Artikulli u publikua gati katër orë përpara se të hiqej embargoja për publikimin e lajmit nga Shtëpia e Bardhë.

    John Micklethwait, kryeredaktori i ‘Bloomberg-ut’, tha në një njoftim për stafin të hënën se artikulli përbënte një shkelje të qartë të standardeve etike. ‘Bloomberg-u’ nuk tregoi se sa punonjës u disiplinuan dhe nuk i identifikoi ata.

    Ai tha se i kishte shkruar secilit prej ish të burgosurve për t’i kërkuar falje. Micklethwait gjithashtu tha se i kishte shkruar edhe redaktorit të gazetës ‘Wall Street Journal’, punëdhënësit të gazetarit të arrestuar dhe dënuar në Rusi, Evan Gershkovich.

    “Ne e trajtojmë saktësinë e lajmit shumë seriozisht”, tha ai në njoftim. “Por ne kemi gjithashtu përgjegjësi për të bërë gjënë e duhur. Në këtë rast ne nuk e bëmë.”/VOA

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!