Partia Republikane ka marrë kontrollin e Dhomës së Përfaqësuesve të SHBA – duke u rikthyer pjesërisht në pushtet në Shtetet e Bashkuara.

Më shumë se një javë pas zgjedhjeve afatmesme të administratës aktuale amerikane, republikanët siguruan 218 vende – numri i nevojshëm për të dominuar këtë organ të legjislaturës amerikane, transmeton Gazeta Online Reporteri.net.

Nuk dihet ende se çfarë mazhorance fituan republikanët në dhomën e ulët të Kongresit – pasi votat janë ende duke u numëruar në shtetet kyçe për rezultatin e zgjedhjeve.

Siç raporton The Guardian, Kontrolli i Dhomës së Përfaqësuesve është vendimtar pasi do t’i lejojë republikanët të nisin një sërë hetimesh të Kongresit për çështje që variojnë nga tërheqja e gabuar e Biden nga Afganistani deri te hetimet dukshëm më të politizuara të veprimeve të qeverisë gjatë pandemisë Covid dhe aktivitetet e biznesit të djalit të Biden, Hunter.

Një ndër vendimet e para të Dhomës republikane të Përfaqësuesve raportohet se mund të jetë shpërndarja e komisionit hetimor për ngjarjet e 6 janarit të vitit 2021, kur u sulmua Kapitoli nga mbështetësit e ish presidentit Trump.

Pritet që kryetar i dhomës së ulët të Kongresit Amerikan të jetë Kevin McCarthy – pavarësisht faktit se, për momentin, mbështetja e disa prej republikanëve më konservatorë është e pasigurt.

“Amerikanët janë gati për një drejtim të ri dhe republikanët në Dhomën e Përfaqësuesve janë gati të arrijnë rezultate”, shkroi McCarthy pas shpalljes së suksesit të republikanëve në Dhomën e Përfaqësuesve.

Në një intervistë për CNN, dy ditë përpara zgjedhjeve afatmesme, McCarthy përshkroi planet e tij për pushtet, që përfshinin trajtimin e inflacionit, rritjen e krimit dhe sigurinë kufitare. /Reporteri.net