Gazeta britanike The Guardian shkruan se ideologjia politike e presidentit të Kroacisë, Zoran Millanoviq, përkon me atë të kryeministrit të Hugarisë, Viktor Orban dhe liderit serb të Bosnjës, Milorad Dodik, e kundër ideologjisë së Bashkimit Evropian.
Kjo pas një deklarate të presidentit Millanoviq, i cili kritikoi vendet perëndimore që po dërgojnë tanke dhe mjete të tjera ushtarake drejt Ukrainës, për t’u ndihmuar në luftën kundër Rusisë, transmeton Gazeta Online Reporteri.net.
Sipas Millanoviqit, “është e qartë se Krimea [rajon i aneksuar nga Rusia] s’do të jetë asnjëherë pjesë e Ukrainës”, deklaratë kjo që u kritikua rëndë.
Ai po ashtu shtoi se duke dërguar çfarëdo mjeti luftarak në Ukrainë, “lufta vetëm sa shkon e zgjatet”.
Kjo deklaratë e Millanoviqit ishte bazë e përceptimit të prestigjiozes britanike ndaj presidentit kroat.
“Milanoviç ka mbajtur një qëndrim kundër BE-së që kur u zgjodh si kandidat i majtë dhe liberal në vitin 2019, dhe ai e përafroi politikën e tij me atë të kryeministrit hungarez Viktor Orban dhe liderit secesionist serb të Bosnjës Milorad Dodik”, shkruan The Guardian, përcjell Reporteri.net.
Në tekst potencohet edhe fakti se anipse pozita e presidentit të shtetit është më tepër diçka ceremoniale, Millanoviqi, formalisht, portretizohet si komandant suprem i forcave të armatosura.
“Në muajt e fundit ai ka kundërshtuar hapur pranimin e Finlandës dhe Suedisë në NATO, si dhe trajnimin e trupave ukrainase në Kroaci si pjesë e ndihmës së BE-së për atë vend të rrezikuar”, shkruhet tutje. /Reporteri.net/.