×
  • Lajme
  • Botë

    Ukraina dhe Moldavia marrin statusin e vendit kandidat për anëtarësim në BE

    Reporteri
    23 Qershor 2022 | 20:49

    Ukrainës i është dhënë statusi zyrtar i kandidatit në Bashkimin Evropian, pasi u miratua nga 27 liderët e bllokut gjatë një samiti në Bruksel. Moldavisë iu dha gjithashtu statusi i kandidatit ndërsa Gjeorgjia u la në listën e pritjes, në pritje të reformave për të siguruar stabilitetin politik të vendit.

    “Një moment historik”, tha Presidenti i Këshillit Evropian Charles Michel. “Sot shënon një hap vendimtar në rrugën tuaj drejt BE-së.

    Michel më pas uroi presidentin ukrainas Volodymyr Zelenskyy dhe presidenten moldave Maia Sandu dhe shtoi se “e ardhmja jonë është së bashku”.

    Statusi i kandidatit është një përcaktim kryesisht simbolik që pranon se vendi i përzgjedhur është në rrugën e duhur për të filluar procesin e gjatë, kompleks dhe shpesh të ndërlikuar të anëtarësimit.

    Kandidatura nuk garanton automatikisht fillimin e negociatave, e lëre më përfundimin e tyre. Gjatë dekadave të fundit, Shqipërisë, Maqedonisë së Veriut, Malit të Zi, Serbisë dhe Turqisë iu dha statusi i kandidatit, me përparim shumë të kufizuar drejt anëtarësimit. Turqia e mori titullin në dhjetor 1999.

    Pavarësisht simbolikës, statusi përfaqëson një fitore gjeopolitike për Ukrainën, një vend i shkatërruar nga lufta që, deri në fillim të këtij viti, nuk konsiderohej kurrë një pretendent serioz për të hyrë në BE. Masa shihet gjithashtu si një përgjigje ndaj përpjekjes së Rusisë për të rivendosur sferën e saj të ndikimit.

    Komisioni Evropian ka paraqitur shtatë reforma kryesore që Ukraina duhet të kryejë para fundit të vitit. Lista përfshin emërimin e gjyqtarëve për Gjykatën Kushtetuese, luftën kundër korrupsionit dhe pastrimit të parave, mbrojtjen e pakicave kombëtare dhe zbatimin e një ligji që synon të frenojë ndikimin e tepruar të oligarkëve në ekonomi.

    529 eurodeputetë votojnë pro statusit kandidat për Ukrainën, Moldavinë dhe Gjeorgjinë

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!