Kryeministri në detyrë i Kosovës, Ramush Haradinaj, është raportuar të jetë intervistuar nga Prokuroria Themelore e Pejës në cilësinë e dëshmitarit në lidhje me vrasjen e vëllait të tij, Enverit.

Haradinaj dëshminë e tij për vrasjen e mistershme të Enver Haradinajt e ka dhënë sot, sipas raportimeve, tre javë pasi për këtë vrasje foli në një intervistë televizive.

Enver Haradinaj është vrarë në vitin 2005 nga persona ende të panjohur.

Atentati kishte ndodhur në fshatin Raushiq në rrugën kryesore ndërmjet Pejës dhe Deçanit, kundër Enver Haradinaj i cili ndodhej në një veturë.

Kryeministri në largim i Kosovës, Ramush Haradinaj, para tre jave kishte folur për vrasjet e pasluftës në vend – përfshirë atë të një vëllai të tij.

Kreu i AAK-së kishte akuzuar Serbinë se qëndron prapa vrasjeve të kryera në Kosovë pas përfundimit të luftës.

“Jam i sigurt se krejt vrasjet e pasluftës janë bërë nga dora e Beogradit”, kishte deklaruar ai në RTV21.

Serbia këtë e ka bërë “për të nxitur vëllavrasje në Kosovë”, kishte vlerësuar Haradinaj.

“Edhe vëllain tim, Enverin, e kanë vrarë që të na fusin në këtë spirale të vëllavrasjeve”, është shprehur kryetari i Aleancës për Ardhmërinë e Kosovës. /Reporteri.net/.