Në mungesë të të akuzuarve Ilir Sadrijaj dhe Shefqet Zogaj, ka dështuar të mbahet seanca ku të njëjtit po akuzohen për ushtrim ndikimi, ndërsa ish-udhëheqësi i hetimit në Drejtorinë Kundër Krimit të Organizuar në Policinë e Kosovës, Behar Millaku, po akuzohet akuzuar për keqpërdorim të pozitës zyrtare.

Lidhur me mungesën e të akuzuarit Sadrijaj, kryetari trupit gjykues, gjykatësi Ertan Sejfulla tha se nga stacioni policor në Deçan ishin njoftuar se i njëjti gjendet jashtë vendit, raporton “Betimi për Drejtësi”.

Po ashtu, edhe mbrojtësja e të akuzuarit Sadrijaj, avokatja Kosovare Kelmendi njoftoi gjykatën që ai gjendet jashtë vendit duke punuar dhe se i njëjti në fund të shtatorit do të vij në Kosovë dhe do të paraqitej në gjykatë.

Gjithashtu, në këtë seancë mungoi edhe i akuzuari Zogaj për të cilin gjykata kishte lëshuar urdhëresë për verifikim adrese dhe dorëzim ftese, por deri më tani nga stacioni policor Qendra në Prishtinë nuk kishin pranuar asnjë informatë për zbatimin e të njejtes.

Në këtë seancë mungoi edhe mbrojtësja e të akuzuari Zogaj, avokatja Aurora Mulhaxha, për të cilën gjykatësi Sejfulla njoftoi se e njëjta kishte kërkuar që të mos vinte në seancën e sotme për shkak të udhëtimit nga qyteti i Pejës pasi që ishte në dijeni se nuk kishte kushte për mbajtjen e seancës së sotme.

Në fund, gjykatësi Sejfulla tha se për seancën e radhës të akuzuarit Zogaj do t’i përsëritet urdhëresa për verifikim adrese dhe dorëzim ftese, të akuzuarin Sadrijaj do ta njoftonte avokatja Kelmendi, ndërsa avokatja Mulhaxha do të ftohet me ftesë të rregullt.

Në mungesë të kushteve ligjore seanca e sotme u shty për tetor të këtij viti, ndërsa të pranishëm në këtë seancë ishin i akuzuari Millaku me mbrojtësin e tij, avokatin Haxhi Millaku

Ky rast gjykohej nga gjykatësja Naime Krasniqi- Jashanica po për shkak të degradimit të njejtes në departament të përgjithshëm i njëjti rast gjykohet nga gjykatësi Ertan Sejfulla.

Ndryshe, Millaku akuzohet se në cilësinë e ish-udhëheqësit të hetimit në Drejtorinë Kundër Krimit të Organizuar në Policinë e Kosovës, kishte keqpërdorur pozitën e tij zyrtare, ndërsa për ushtrim ndikimi akuzohet ish-zyrtari policor Shefqet Zogaj, si dhe Ilir Sadrijaj.

Më 19 qershor 2018, të akuzuarit ishin deklaruar të pafajshëm për veprat penale që iu vihen në barrë.

Tre të akuzuarit ishin deklaruar të pafajshëm edhe në seancën e 21 marsit të vitit 2018, por mbrojtësi i të akuzuarit Behar Millaku, avokatit Haxhi Millaku, kishte propozuar që ky rast të gjykohet në Gjykatën Themelore në Pejë, pasi sipas tij, një pjesë e hetimeve ishte zhvilluar nga Prokuroria Themelore në Pejë.

Pas propozimit të Millakut, gjykatësja Naime Krasniqi-Jashanica e kishte dërguar këtë lëndë te kryetarja e Gjykatës Themelore në Prishtinë, e cila e kishte deleguar në Gjykatën Themelore në Pejë, por kjo e fundit i ishte drejtuar Gjykatës së Apelit, e cila përfundimisht kishte vendosur që këtë çështje ta gjykojë Gjykata Themelore në Prishtinë.

Sipas aktakuzës, të akuzuarit Ilir Sadrijaj dhe Shefqet Zogaj me qëllim që vetit dhe personit zyrtar Behar Millaku t’i sjellin përfitim të kundërligjshëm, kanë kërkuar para nga pronari i kompanisë së lojërave të fatit “EGTK II SHPK”, Skender Fetaj, në mënyrë që i akuzuari Millaku, në cilësinë e udhëheqësit të hetimit në Drejtorinë Kundër Krimit të Organizuar, i cili ishte duke hetuar rastin e kësaj kompanie, të krijojë lehtësira gjatë hetimit, për t’ia hapur lokalet e lojërave të fatit, të cilat ishin mbyllur nga policia dhe për t’i mbyllur hetimet e fituara ndaj tij.

Në aktakuzë thuhet se i akuzuari Zogaj, kishte siguruar informata për rrjedhjen e hetimeve ndaj Skender Fetaj, dhe të njëjtat ia kishte dërguar të akuzuarit Sadrijaj, në mënyrë që ta bindin të dëmtuarin Fetaj, për t’i dhënë paratë.

Fillimisht, Sadrijaj ka kërkuar nga ish-punëtori i kësaj kompanie Avni Qerimi, që të kërkojë nga i dëmtuari Fetaj shumën prej 4.000 euro, i cili këto para i kishte thënë menaxherit të kësaj kompanie Denis Cocaj, që t’ia dërgonte të akuzuarit Sadrijaj.

Tutje, sipas aktakuzës, më 10 janar 2017, këto para Qerimi, ia kishte dhënë të pandehurit Sadrijaj, i cili pas disa ditësh ishte takuar me Fetajn dhe i kishte thënë se fillimisht duhet t’i jepte 30.000 euro për udhëheqësin e hetimit Behar Millaku, pastaj edhe shumën prej 300.000 euro, dhe e kishte sugjeruar që ta ndërrojë avokatin në mënyrë që këto para t’i dorëzohen policit Millaku, për t’i mbyllur hetimet ndaj tij.

Mirëpo, siç thuhet, i dëmtuari Fetaj, më 26 janar 2017, ishte koordinuar me policinë, dhe i kishte fotografuar shumën prej 30.000 euro, dhe kur Denis Cocaj, Bajram Kurmehaj ishin takuar me Sadrijaj, në lokalin “Liridoni” në rrugën Pejë –Deçan, Kurmehaj shumë prej 30.000 euro ia kishte dhënë në zarf Sadrijajt.

Kështu, sipas aktakuzës, pasi Sadrijaj së bashku me Zogajn i kishin marrë paratë, kishin hyrë në lokale dhe bastore të ndryshme dhe gjatë natës kishin bërë ndërrimin e parave, pastaj ishin takuar me Millakun dhe ia kishin dhënë shumën prej 2.000 euro, ndërsa Millaku me veturë të cilën e drejtonte Shaban Ramaj ishin ndaluar nga Inspektorati Policor i Kosovës dhe me rastin e kontrollimit, i kishin sekuestruar shumën prej 2.000 euro, ndërsa Sadrijaj nga ana e policisë në Pejë i janë gjetur 2.200 euro.

Prokuroria të akuzuarin Behar Millaku e ngarkon me veprën penale “keqpërdorim i pozitës apo autoritetit zyrtar”, ndërsa të akuzuarit Ilir Sadrijaj dhe Shefqet Zogaj me veprën penale “ushtrim i ndikimit”.