×
  • Lajme
  • Lajme / Ora 12:00

    “Drejtësi për Marigona Osmanin”, nesër protestohet kundër vendimit për kthimin në rigjykim të rastit

    Reporteri
    27 Shkurt 2024 | 11:38

    Kolektivi për Mendim dhe Veprim Feminist ka bërë thirrje që nesër (e mërkure) të protestohet kundër vendimit të Apelit për kthimin në rigjykim të rastit të vrasjes së Marigona Osmanit, shkruan Reporteri.net.

    Protesta do të nis në ora 12:00 te Pallati i Drejtësisë.

    “Është shqetësuese se si Gjykata e Apelit asnjëherë nuk e adreson qasjen problematike të Gjykatës Themelore në trajtimin dhe vlerësimin e dhunimit si vepër penale. Dhunimi seksual është detyrimi në kryerjen e aktit seksual pa dhënien e pëlqimit. Mirëpo Gjykata Themelore nuk e ka të qartë se çka do të thotë kjo, dhe gabimisht nxjerrë konkluzione duke u mbështetur vetëm në provat e lëndimit fizik gjenital. Prezenca e lëndimeve fizike nuk është vendimtare për përcaktimin e dhunimit. Prokuroria ka parashtruar si provë video inçizimet, dëshminë e dhënë nga eksperti mjeko-ligjor si dhe provat për kanosjen dhe dhunën ekstreme që tregojnë se Marigona nuk ka qenë në gjendje të japë pëlqim për aktin seksual. Gjykata Themelore tërësisht e ka injoruar video-inçizimin dhe dëshminë e ekspertit mjeko-ligjor, që dëshmon mungesën e pëlqimit si element esencial i veprës penale të dhunimit, si dhe rrethanat e dhunshme dhe frikshme në të cilat ndodh ajo.
    Nga ana tjetër, gabimet dhe lëshimet e njëpasnjëshme nga Gjykatat Themelore, të cekura nga Apeli, pasqyrojnë neglizhencën e grave nga sistemi, çka është duke i bërë këto raste barrë të familjeve të viktimave dhe të të mbijetuarave”, thuhet mes tjerash në njoftim.

    Njoftimi:

    AKSION PROTESTUES: DREJTËSI PËR MARIGONA OSMANIN

    Këtë të mërkurë, ne thërrasim në mobilizim popullor për ta kundërshtuar praktikën e sistemit të drejësisë në Kosovë i cili është duke treguar që nuk funksionon për gratë, duke ua pamundësuar atyre çfarëdo lloj drejtësie. Vendimi i Gjykatës së Apelit që ta dërgojë në rigjykim lëndën e vrasjes së Marigona Osmanit na revolton tej mase meqë përtej këtij rasti reflekton një praktikë të shpeshtë në rastet e dhunës ndaj grave dhe femicidit, e cila e kthen rastin në pikën zero, duke krijuar pasiguri për gratë në Kosovë dhe rrezikuar që Marigonës t’i bëhet padrejtësi edhe për së vdekuri.

    Gjykata e Apelit në vendimin e saj bie pre e vetë kritikës së saj sepse nuk është e qartë dhe e plotë në vlerësimin e aktgjykimit. Arsyetimet dhe kërkesat e Gjykatë së Apelit ku ndër të tjera, vihet në pikëpyetje mënyra mizore me të cilën Dardan Krivaqa, me ndihmën e Arbër Sejdiut e kanë vrarë Marigonën janë shqetësuese për ne. Përfshirja e motivit të vrasjes, e cila po ashtu është problematike në vetvete nuk e përjashton se vrasja është kryer në mënyrë mizore dhe kjo vërtetohet përgjatë tërë aktgjykimit të Gjykatës Themelore edhe me anë të dëshmisë së ekspertit mjekoligjor si dhe raporteve forenzike. Një sugjerim i tillë e rivendosë theksin tek motivet e vrasjes dhe jo akti per se, çka për ne është e papranueshme.

    Tutje, është shqetësuese se si Gjykata e Apelit asnjëherë nuk e adreson qasjen problematike të Gjykatës Themelore në trajtimin dhe vlerësimin e dhunimit si vepër penale. Dhunimi seksual është detyrimi në kryerjen e aktit seksual pa dhënien e pëlqimit. Mirëpo Gjykata Themelore nuk e ka të qartë se çka do të thotë kjo, dhe gabimisht nxjerrë konkluzione duke u mbështetur vetëm në provat e lëndimit fizik gjenital. Prezenca e lëndimeve fizike nuk është vendimtare për përcaktimin e dhunimit. Prokuroria ka parashtruar si provë video inçizimet, dëshminë e dhënë nga eksperti mjeko-ligjor si dhe provat për kanosjen dhe dhunën ekstreme që tregojnë se Marigona nuk ka qenë në gjendje të japë pëlqim për aktin seksual. Gjykata Themelore tërësisht e ka injoruar video-inçizimin dhe dëshminë e ekspertit mjeko-ligjor, që dëshmon mungesën e pëlqimit si element esencial i veprës penale të dhunimit, si dhe rrethanat e dhunshme dhe frikshme në të cilat ndodh ajo.
    Nga ana tjetër, gabimet dhe lëshimet e njëpasnjëshme nga Gjykatat Themelore, të cekura nga Apeli, pasqyrojnë neglizhencën e grave nga sistemi, çka është duke i bërë këto raste barrë të familjeve të viktimave dhe të të mbijetuarave.

    Ne jemi të indinjuar/a dhe të revoltuar/a me këtë vendim të Gjykatës së Apelit që pasqyron një problem më të thellë sistemik dhe neglizhimin të theksuar institucional të jetave të grave. Prandaj thërrasim në organizim dhe vëmendje për këtë rast. Nuk mund të lejojmë që rasti i Marigonës të zvarritet në ndërtesat e gjykatave dhe eventualisht t’ua thellojë edhe më tej dhimbjen familjarëve të saj. Nuk mund të lejojmë që praktika të tilla ping-pongu me jetat e grave të bëhen normë.

    Ju ftojmë që të na bashkoheni këtë të mërkurë, nga ora 12:00,në Pallatin e Drejtësisë, pranë Gjykatës së Apelit të protestojmë dhe të kërkojmë drejtësi për Marigonën dhe çdo grua tjetër, të gjallë a të vdekur.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!