Bastisja e një shtëpie gjatë mbrëmjes të së martës në Zhur të Prizrenit përfundoi me një shpërthim. Një polic u vra, dy të tjerë u lënduan, e plagë mori edhe një fëmijë i shtëpisë ku po kryhej operacioni antidrogë.

Një nga policët që mbeti i plagosur në aksionin e mbrëmshëm në Zhur të Prizrenit është Artur Mrasori. Ai është me prejardhje nga fshati Mrasor i Rahovecit, shkruan Reporteri.net.

Gjatë natës së mbrëmshme nga Spitali i Prizrenit, ai u transferua  për në QKUK, pasi që gjendja e tij  shëndetësore ishte më e rëndë. Drejtori i Klinikës Emergjente në QKUK, Basri Lenjani ka konfirmuar se përkundër lëndimeve ai ndodhet jashtë rrezikut për jetë.

Megjithatë burime brenda QKUK-së kanë konfirmuar se dyshohet Mrasori ka mbetur i verbuar pas shpërthimit të mbrëmshëm. Ky informacion nuk është ende zyrtar.

Ngjarja tragjike, ku polici Sami Thaçi humbi jetën, ka ndodhur të martën derisa njësitë e Policisë së Kosovës ishin duke kryer një aksion bastisje në një shtëpi në fshatin Zhur të Prizrenit. /Reporteri.net