Prokuroria Themelore e Mitrovicës ka konfirmuar se kreu i Mitrovicës, Agim Bahtiri është kërcënuar.

Prokuroria konfirmon se Bahtirit dhe familjes së tij i është ofruar mbrojtja policore, shkruan Reporteri.

“Prokuroria Themelore e Mitrovicës njofton opinionin se bazuar në informatat dhe të dhënat e pranuara në adresë elektronike nga ankuesi – kryetari i Mitrovicës së Jugut A.B., Prokuroria Themelore në Mitrovicë, ka autorizuar hetuesit policorë të ndërmarrin veprime hetimore mbi dyshime të “Kanosjes, shantazhit dhe detyrimit” ndaj të njëjtit”, thuhet në njoftim.

Prokuroria Themelore e Mitrovicës, tutje thekson se si rrjedhojë e kërcënimeve ndaj kryetarit të Mitrovicës së Jugut A.B., është vlerësuar e nevojshme prezenca policore në vendbanimin e ankuesit.

Ndryshe Reporteri merr vesh se Bahtiri është kërcënuar prej disa ditësh me disa mesazhe dhe se kërcënimet kanë qenë të drejtuara edhe kah familja e tij. /Reporteri.net