Kryeministri i Shqipërisë, Edi Rama, i ka dalë në përkrahje kryeministrit kosovar, Albin Kurti, pas arritjes së ujdisë mes Kosovës dhe Serbisë për çështjen e targave.
Përmes një postimi në Twitter, Rama ka thënë se Kurti s’duhet të sulmohet pse u soll si një kryeministër.
Sipas tij, marrëveshja e arritur mbylli “shtegun e rihapur të zhvillimeve të paparashikueshme”.
“S’jam aspak dakord me sulmet ndaj Albin Kurtit pas marrëveshjes së duhur që fatmirësisht mbylli shtegun e rihapur të zhvillimeve të paparashikueshme! Ta sulmosh Albinin pse u soll si kryeministër është njësoj si t’i kërkosh hesap pse nuk mendon e flet njësoj si kur ishte në burg!”, ka shkruar Rama.
S’jam aspak dakord me sulmet ndaj Albin Kurtit pas marrëveshjes së duhur që fatmirësisht mbylli shtegun e rihapur të zhvillimeve të paparashikueshme! Ta sulmosh Albinin pse u soll si kryeministër është njësoj si t’i kërkosh hesap pse nuk mendon e flet njësoj si kur ishte në burg!
— Edi Rama (@ediramaal) November 24, 2022
Ndryshe, si pasojë e kësaj marrëveshje pati pakënaqësi të shumta, ku sot pati edhe një aksion të organizuar nga PSD, para ndërtesës së Qeverisë.
Megjithatë, kjo marrëveshje u duartrokitë nga bashkësia ndërkombëtare.