Ftohen investitorët japonezë të investojnë në Kosovë

Lajme

Ftohen investitorët japonezë të investojnë në Kosovë

Reporteri

28 Tetor 2020 | 8:40

Në përkrahje të Ambasadës së Republikës së Kosovës në Japoni dhe Ministrisë së Punëve të Jashtme dhe Diasporës së Republikës së Kosovës, Asociacioni i Miqësisë Kosovare-Japoneze ka organizuar diskutimin virtual me titull “Miqësia ndërmjet Kosovës dhe Japonisë”.

Me këtë rast, në emër të MPJD-së, Zëvendësministrja Teuta Sahatqija, si bashkë-nikoqire e kësaj ngjarje, i ka përshëndetur të pranishmit dhe ka falënderuar Japoninë për kontributin e dhënë gjatë këtyre viteve, sidomos së fundmi në dhënien e donacioneve në përkrahje të menaxhimit të pandemisë COVID-19. Me këtë rast i ka ftuar investitorët japonezë ta konsiderojnë Kosovën si një destinacion potencial investimi.

Si folës kryesor, presidenti Thaçi iu ka drejtuar të pranishmëve me një mesazh rasti ku ndër të tjera ka veçuar Japoninë si partner strategjik të Kosovës në Azinë Lindore. Ai ka thënë se ka ardhur koha që si institucionet ashtu edhe popujt e të dyja vendeve duhet të punojnë më tepër në thellimin e mëtejmë të raporteve bilaterale ekonomike.

Lexo edhe:

Nagavci mirëpret vendimin për pezullimin nga puna të Xhevat Krasniqit

Macron telefonon Kurtin, bën thirrje për zbatimin e marrëveshjeve ndërsa anëtarësimin në KiE e lidh me Asociacionin

Kurtin kujton Ditën Ndërkombëtare të Turqve të Kosovës, i uron për kontributin ndaj vendit

Nga Tokio është paraqitur Konsulli i përgjithshëm i nderit i Republikës së Kosovës, Iijima Isao si dhe Kryesuesi i Ligës së Miqësisë Japoni-Kosovë në Parlamentin e Japonisë Shionoya Ryu. Që të dy kanë përshëndetur hapjen e Ambasadës së Japonisë në Prishtinë dhe kanë uruar popullin e Kosovës për më shumë progres e prosperitet dhe shëndet tani në kohën e pandemisë.

Ish-ambasadorët kosovarë në Japoni, Sami Ukelli, Ahmet Shala dhe Leon Malazogu, dhe në anën tjetër ish-ambasadorët japonezë në Kosovë Makoto Taketoshi dhe Koinuma Kiyoshi, ishin gjithashtu pjesë e këtij diskutimi.

Të gjithë ndanë përvojat më të mira të tyre dhe dhanë rekomandime konkrete për të ardhmen e raporteve bilaterale ndërmjet shteteve.

Luljeta Arifi, Drejtoreshë dhe themeluese e Asociacionit së Miqësisë Kosovare-Japoneze ka theksuar se çmon bashkëpunimin dhe përkrahjen që e ka hasur nga Ambasada e Republikës së Kosovës në Japoni dhe MPJD në realizimin e këtij aktiviteti të rëndësishëm për afrimin e raporteve ndërmjet dy popujve dhe vendeve.

Ndërkaq, ky aktivitet u përshëndet edhe nga Korab Mushkolaj – Udhëheqës i Departamentit për Marrëdhënie Dypalëshe në MPJD si dhe nga Enis Xhemaili – I ngarkuar i përkohshëm me punë në Ambasadën e Republikës së Kosovës në Tokio.

Ky ishte edicioni i parë i projektit të titulluar “Ta njohim më mirë Japoninë dhe Kosovën përmes ndarjes së përvojave”. Edicioni i dytë do të prekë temën e arsimit, ndërkaq i treti temën e asistencës dhe ndihmave japoneze për Kosovën./Reporteri.net/.

Shpërndaje: