Gjakova e shkatërruar gjatë luftës, flasin banorët

Menjëherë pas përfundimit të luftës, Shkëlqim Jupa kishte filluar renovimin e restorantit të tij, i cili ishte djegur tërësisht.


Tri vjet iu deshën atij që restorantin ta shndërrojë në njërin nga hotelet më të frekuentuara në komunën e Gjakovës.

Ai tregon se si pas kthimit nga lufta, ku ishte edhe pjesëtar i UÇK-së, çlirimi i vendit i kishte dhënë vullnet që të fillojë gjithçka nga zeroja.

Në natën e parë të bombardimeve të NATO-s, serbët filluan spastrimin e Gjakovës, raporton KTV.

Policia serbe dogji qendrën e vjetër të qytetit, duke djegur dyqanet dhe shtëpitë e shqiptarëve.

Zjarri në Çarshinë e vjetër zgjati 4 ditë, tregon Ruzhdi Qarri, i cili ka 40 vjet që merret me zanatin e zdrukthëtarit.

Komuna e Gjakovës ishte njëra nga komunat më të shkatërruara nga lufta dhe me shumë viktima.

Shumë persona figurojnë të zhdukur, edhe 20 vjet pas.

Në këtë komunë, Beteja e Çabratit, që zgjati tre ditë, në mes të UÇK-së dhe ushtrisë serbe, ishte beteja e parë urbane, ku u vranë 23 dëshmorë e 87 martirë.

Gjithashtu ishin rrëmbyer dhe zhdukur 43 qytetarë të kësaj lagjeje.