Presidenti i vendit, Hashim Thaçi thuajse nuk lë paraqitje mediale por edhe në konferenca apo statuse në Facebook që nuk flet për idenë e korrigjimit të kufirit.

Ai vazhdon të besoj fuqishëm se Lugina e Preshevës duhet t’i bashkohet Kosovës dhe për arritjen e këtij qëllimi thotë se politika duhet të jetë e bashkuar.

“e drejta e përfshirjes së Preshevës, Bujanocit dhe Medvegjës me Republikën e Kosovës është legjitime, korrigjim i padrejtësive historike dhe siguri për qytetarët e asaj treve për të jetuar në trojet e tyre”, tha Thaçi në një nga statuset e fundit.

Por këtyre zërave të vazhdueshme të Thaçit i është kundërpërgjigjur kryeministri Ramush Haradinaj.

Ai thotë se duhet pasur kujdes kur ju premtohet shqiptarëve të Preshevës, Medvegjës e Bujanocit se do bashkohen me Kosovën.

“Duhet me pas kujdes si ju qasemi shqiptarëve të Preshevës. Dëshira me na u bashku Presheva, dhe rasti i ndarjes se Kosovës, janë dy raste të ndryshme”, tha Haradinaj në Dukagjin, shkruan Reporteri.net.

Për këtë temë mbrëmë foli edhe deputeti Daut Haradinaj që është vëllau i kryeministrit.

Deputeti i AAK-së tha se presidenti po luan emocionalisht me shqiptarët e Luginës së Preshevës.

“Pa një njohje reciproke nuk jam i gatshëm me ju thanë qytetarëve të Kosovës do ta marrim Luginën e Preshevës. Shpresoj që Lugina të bashkohet me Kosovën. Po luhet me emocionet e shqiptarëve jashtë Kosovës, sepse ata janë në gjendje siç ishin shqiptarët e Kosovës para 20 vitesh”, ka deklaruar Haradinaj. /Reporteri.net/.

Daut Haradinaj: Ideja e lëvizjes së kufijve ka vdekur, Thaçi po luan me emocionet e shqiptarëve të Luginës