Dy punonjës në gjimnazin “Hivzi Sylejmani” në komunën e Fushë Kosovës, kanë rezultuar pozitivë në testimet për coronavirus.
Lajmin e ka bërë të ditur për Gazetën Online “Reporteri.net”, zëdhënësi i Komunës së Fushë Kosovës, Ali Topalli.
Topalli ka njoftuar se personat e infektuar janë një mësimdhënës dhe një punëtor teknik.
Pavarësisht kësaj, mësimi në këtë shkollë ka vazhduar me skenarin e dytë për procesin mësimor, i cili parasheh rikthimin e pjesshëm në institucione shkollore (mësimi i kombinuar – prezencë dhe mësim në distancë).
Topalli po ashtu ka bërë të ditur se deri më tani në këtë shkollë janë gjithsej tre persona të infektuar me COVID-19, prej tyre dy mësimdhënës dhe një punëtor teknik.
“Po, kemi dy punëtorë të stafit që kanë rezultuar pozitivë, një mësimdhënës dhe një punëtor teknik. Gjendja e tyre shëndetësore është e mirë. Janë testuar edhe pjesa tjetër e stafit, të gjithë kanë rezultuar negativë. Mësimi po vazhdon sepse nuk ka shenja të përkeqësimit të situatës as në mesin e stafit as te nxënësit”, ka thënë Topalli për Reporterin. /Reporteri.net