Kosovës i kërkohet strategji më e mirë për paraqitjen e krimeve serbe

Serbia duhet të bëhet përgjegjëse për krimet e bëra në Kosovë ndërvite.

Kështu u tha në tubimin e organizuar të shtunën, për nder të 15 janarit, ditës së përkujtimit të Gjenocidit ndaj shqiptarëve të Kosovës, nga Instituti për të Vërtetën, Drejtësinë dhe Paqen.

Vrasjet që u bën, u tha se ishin nga format më të rënda, të cilat u shndërruan në masakra, për të realizuar një projekt të madh të Serbisë.

“Rastet e vrasjeve masive janë të shumta, ato ishin masakra të vërteta, siç është masakra e Reçakut, të cilët po mundohen ta mohojnë”, tha Jusuf Osmani, profesor në degën e Arkivave në UP.

Kosovës iu kërkua të bëjë padi ndaj Serbisë për gjenocid. Për këtë, u tha se mund ta bëjë edhe Shqipëria, si anëtare e OKB-së.

“Nëse Serbia shpallet e fajshme për gjenocidin në Kosovë, gjeneratë pas gjenerate, kurrë nuk shlyhet, është një njollë e përjetshme”, tha Qebir Avziu, Dekan i Fakultetit të Edukimit në Universitetin e Tetovës.

Ndërsa, profesori Lulzim Nika, vlerësoj se Kosova duhet të kishte një strategji më të mirë për të paraqitur krimet serbe në botë.

“Për fatin e keq edhe sot pas dy dekadave e më shumë, masakrat dhe krimet serbe në Kosovë nuk prezantohet në mënyrë të drejtë”, tha ai.

Gjatë luftës së fundit në Kosovë janë vrarë 13 mijë e 518 persona.