Këshilli Shtetëror i Cilësisë (KSHC), ka riaktredituar 8 programe që funksionojnë në kuadër të fakulteteve të Universitetit të Mitrovicës.
Kështu kanë njoftuar drejtues të Universitetit të Mitrovicës “Isa Boletini”, përmes një njoftimi zyrtar.
“Programet e riakredituara janë në nivelin bachelor dhe master, dhe se riakreditimi i tyre është për një periudhë 3-vjeçare. Tashmë në UMIB janë të akredituara gjithsej 18 programe në të dy nivelet, transmeton Telegrafi. Në ndërkohë UMIB-i është në pritje të vendimit zyrtar nga KSHC-ja sa i përket riakreditimit institucional, në mënyrë që të shfrytëzoj të drejtën e ankesës”, thuhet në këtë njoftim.
Drejtuesit e këtij universiteti publik, janë të bindur se argumentet që kanë janë bindëse për të marrë një përgjigje pozitive sa i përket akreditimit institucional.
Kurse vendimi i KSHC-së për mos akreditim institucional që pamundëson regjistrimin e studentëve të rinj në vitin akademik 2019/20, është skandaloz, i pabazuar në gjendjen faktike dhe shumë i dëmshëm për Universitetin dhe të rinjtë e rajonit.
Po ashtu kërkohet ndërhyrja e drejtuesve të institucioneve të Republikës së Kosovës, për të ndaluar veprime të tilla të papërgjegjshme të KSHC-së./Reporteri.net/.