Kreu i VV-së, Albin Kurti dhe ai i LDK-së, Isa Mustafa mbrëmë kanë pasur një takim të gjatë në përpjekjet e fundit për të arritur një marrëveshje për bashkëqeverisje.
Për takimin që u raportua se ka zgjatur deri në orët e vona të mesnatës, deri më tani nuk janë deklaruar as nga Vetëvendosje dhe as nga Lidhja Demokratike e Kosovës.
Mirëpo, Reporteri mëson se mbrëmë ka pasur përafrime të qëndrimeve në mes të dy palëve dhe se Kurti e Mustafa pritet të takohen edhe gjatë natës së sontme për të vazhduar përpjekjet për një marrëveshje të mundshme. Takimi mes Mustafës e Kurtit pritet të zhvillohet rreth orës 17:00, në Prishtinë. Palët sërish nuk do të takohen brenda zyreve të institucioneve të vendit, siç ndodhi gjatë herëve të kaluara.
Kujtojmë se Lidhja Demokratike e Kosovës, ka vendosur afat ditën e diel, si ditën kur duhet të arrihet marrëveshja ose palët të tërhiqen nga bisedimet.
Takimi i mbrëmshëm Kurti-Mustafa, ishte zhvilluar në shtëpinë e këtij të fundit në Prapashticë, e cila kohë më parë ishte shënjestër e sulmeve fizike të militantëve të Lëvizjes Vetëvendosje.
Kujtojmë se, Albin Kurtit, të mandatuarit për kryeministër, i kanë mbetur vetëm dhe 11 ditë për krijimin e qeverisë. /Reporteri.net