Kryeministri në detyrë i Kosovës, Ramush Haradinaj ka reaguar për lajmet se është paditur nga homologu i tij shqiptar, Edi Rama. Në fakt të dytë shpesh e thirrshin njëri-tjetrin ‘vëlla’. Por sot gjithçka duket sikur këta janë armiqtë me të mëdhenj. Është paradoksale, që një komb në dy shtete, vjen në një situatë që kryeministrat e tyre të jenë armiq mes vete.
Pas 100 vjetësh armiqësi me Serbinë, sot kemi “armiqësi” mes shteteve shqiptare.
Në reagimin e tij Haradinaj ka thënë se do të përgatis përgjigje dhe e ka quajtur të pa bazuar.
“Sot është raportuar në media se Kryeministri i Shqipërisë Edi Rama ka deponuar padi kundër meje në Gjykatë. Unë, sipas ligjit, do të përgatis përgjigje në padi, në afatet e përcaktuara ligjore! Padia e Kryeministrit Rama është plotësisht e pabazuar dhe një diverzion politik që bëhet nga ana e tij, që të fshihet pas dramave mediale dhe t’i ikë përgjegjësisë. Kombi ynë dhe Kosova ka njerëz që i dalin zot në çdo kohë”, ka shkruar ai.
Kreu i ekzekutivit shqiptar, ka ushtruar padi ndaj homologut të tij nga Kosova, Ramush Haradinaj.
Padia e Ramës, të cilën e ka siguruar ekskluzivisht “Betimi për Drejtësi”, të mërkurën, është dorëzuar në Gjykatën Themelore në Prishtinë.
Me pretendimet se Haradinaj ka shpifur me deklarimet e tij ndaj kryeministrit shqiptar, Edi Rama kërkon kompensim të dëmit.
Padia e Edi Ramës, e cila përmban mbi 30 faqe, pretendon se Haradinaj ka shpifur ndaj Ramës, për deklaratat e tij që i ka dhënë në lidhje me temën e shkëmbimit të territoreve.
Në këtë padi, përmenden disa emisione të transmetuara gjatë muajit tetor të vitit të kaluar, në të cilat Haradinaj ka folur për këtë temë, e ku e ka akuzuar Ramën, që së bashku me Hashim Thaçin dhe Aleksandër Vuciqin, kanë nisur idenë e shkëmbimit të territoreve ndërmjet Kosovës dhe Serbisë.