Kryeministri Ramush Haradinaj, ka nderuar humanistin Halil Kastrati me dekoratën e Kryeheroit Gjergj Kastrioti Skenderbeu, për punën e palodhshme që ai po bën për të ndihmuar të nevojtarët.
Humanisti Halil Kastrati, duke ndërtuar shtëpi, blerë banesa, dhënë ushqim, e siguruar mjetet financiare për shërim, ka ndihmuar mijëra familje.
“Në shenjë falenderimi për punën e madhe humanitare, si një vlerë komplementare e jona dhe për kontributin në të gjitha proceset deri në liri, sot nderova me dekoratën e Kryeheroit Gjergj Kastrioti Skenderbeu, humanistin dhe themeluesit e shoqatës bamirëse, “Jetimat e Ballkanit”, z.Halil Kastrati”, ka thënë Haradinaj.
Kryeministri përveç kësaj ka ofruar gatishmërinë e qeverisë që drejton për ta mbështetur një projekt të madh të Kastratit.
“Shpreha gatishmërinë e Qeverisë së vendit për mbështetjen në projektet e kësaj organizate, me theks të veçantë mbështetjen për ndërtimin e një jetimoreje për fëmijët e braktisur”.
“Veprimet humane janë përcaktim dhe e drejtë e gjithësecilit dhe meritojnë respekt”, ka thënë Haradinaj pas takimit me humanistin Kastrati. /reporteri.net