Lirohen Dardan Molliqaj dhe aktivistët e tjerë të PSD-së që u arrestuan sot

Dardan Molliqaj, Teutë Rrusta, Qëndrim Sahiti, Agron Kabashi edhe Zgjim Hyseni janë liruar në procedurë të rregullt pasi u arrestuan këtë të martë në aksionin që zhvilluan për të penguar fjalimin e kryetares së Dhomave të Specializuara, Ekaterina Trendafilova.


Këtë e ka bërë të ditur zëdhënësi i policisë për rajonin e Prishtinës, Agron Borovci, duke thënë se veprimet e aktivistëve ishin determinim për reagimin e policisë.

Reklamë

“Rreth orës 10:00 është pranuar informata për një aktivitet të paparalajmëruar nga një grup personash, të ndodhur në rrugën “Agim Ramadani” në Prishtinë. Veprimet që kanë karakterizuar këtë aktivitet kanë determinuar reagimin policor dhe për rrjedhojë pesë nga këta persona janë shoqëruar në stacionin policor”.

“Hetuesit policorë të udhëhequr nga prokurori i shtetit kanë kryer veprimet preliminare hetimore me qëllim të sqarimit dhe ndriçimit të plotë të rrethanave që kanë karakterizuar ngjarjen. Së këndejmi me vendim të prokurorit të shtetit ndaj dy të dyshuarve është iniciuar hetim për veprën penale “Pengim i personit zyrtar në kryerjen e detyrës zyrtare” përderisa ndaj të gjithëve është iniciuar “Procedurë Kundërvajtëse””.