Nga ministria e Punëve të Jashtme kanë folur për pretendimet e Serbisë se shteti i Ganës e ka tërhequr njohjen e pavarësisë së Kosovës.

Përmes një komunikate për media, MPJ hedh poshtë pretendimet e Serbisë, dhe kërkon që propaganda e Beogradit të mos prezantohet si lajm në media, shkruan lajmi.net.

MPJ thotë se Kosova është njohur nga 116 vende anëtare të OKB-së, përfshirë edhe Ganën.

Ky është reagimi i parë i MPJ-së pas dokumenteve të prezentuara në media, si provë që ky shtet e ka tërhequr njohjen e Kosovës.

Njoftimi i plotë:

MPJ hedh poshtë pretendimet e Serbisë, kërkon që propaganda serbe të mos prezantohet si lajm Ministria e Punëve të Jashtme e Republikës së Kosovës dëshiron të njoftoj opinionin se nuk ka asgjë të vërtetë në lidhje me pretendimet e ministrit serb Ivica Daçiq për tërheqjen e njohjes së pavarësisë së Kosovës nga Gana. Republika e Kosovës është njohur nga 116 vende anëtare të OKB-së përfshirë këtu edhe Republikën e Ganës. Ministria e Punëve të Jashtme është në komunikim të rregullt me ambasadat e Ganës në qendra të ndryshme të botës, dhe asnjëra prej tyre nuk kane asnje informacion ne lidhje me pretendimin e ministrit serb. Është e habitshme se si disa media, edhe në Kosovë, transmetojnë të pavërteta të servuara nga institucionet e Serbisë dhe përmes “fake neës” domosdo i shkaktojnë dëm Republikës së Kosovës dhe qytetarëve të saj. Gazetarët kanë kapacitet për të kuptuar seriozitetin e shtetit dhe betejat diplomatike me të cilat ballafaqohet Republika e Kosovës, andaj në këtë pikë duhet të tregohen shumë më të kujdesshëm dhe më profesionistë në mënyrë që të mos bien pre e propagandës serbe e cila nga Beogradi zyrtar prezantohet si lajm. Metodat e mirënjohura dhe të bazuara në shembuj të tjerë që po i përdorë Daçiq me lobuesit e tij me histori të dyshim kriminale, janë në proporcion të zhdrejtë me politiken paqësore rajonale, paqen dhe harmoninë në mes shteteve. Ministria e Punëve të Jashtme e Republikës së Kosovës fton të gjitha mediat në Kosovë dhe jashtë saj që të verifikojnë më shumë se njëherë secilin lajm për Kosovën i cili prodhohet në Serbi, duke e ditur mirëfilli se pas krimeve kundër njerzimit, përpjekjeve për të kryer gjenocidin dhe për ta shëndrruar Kosovën në tokë të djegur, Beogradit zyrtar tashti qëllim esencial ka mohimin e shtetësisë së Kosovës.