Në oborrin e QKUK-së edhe karabinieri, pas kërcënimeve për sulme

Njësia Speciale e Policisë së Kosovës është duke patrulluar në oborrin e QKUK-së për të siguruar këtë zonë, pas një kërcënimi për sulme që ka marrë sot Policia e Kosovës.


Në pamjet e siguruara nga Reporteri.net, shihen pjesëtarë të Policisë së Kosovës të cilët po e sigurojnë zonën rreth QKUK-së.

Përveç Njësisë Speciale në oborrin e Qendrës Klinike Universitare të Kosovës janë edhe karabinieri italian.

Në fotot e realizuara nga gazetari i Reporterit shihet se në oborrin e QKUK-së janë edhe veturat e karabinerit italian.

 

Nga Policia e Kosovës kanë thënë për Reporterin se Policia e Kosovës me kohë ka ndërmarrë masat parandaluese dhe të sigurisë, pas sigurimit të një informate që ndërlidhet me kanosje.

Sipas Policisë përderisa janë ndërmarrë të gjitha masat policore, situata vlerësohet e qetë dhe nuk ka vend për asnjë shqetësim nga ana e qytetarëve.

“Policia e Kosovës është institucion i zbatimit të ligjit dhe trajton ç’do informacion apo rast të raportuar, të ç’farëdo natyre apo vepre penale.

Të gjitha veprimet e nevojshme i ndërmerr konform autorizimeve ligjore në bashkëpunim dhe koordinim me institucionet kompetente, me qëllim të ofrimit të sigurisë, parandalimit të veprimtarive kriminale si dhe ruajtjes së rendit dhe qetësisë publike në vend.

Policia e Kosovës me kohë ka ndërmarr masat parandaluese dhe të sigurisë, pas sigurimit të një informate që ndërlidhet me kanosje, përderisa janë ndërmarrë të gjitha masat policore, situata vlerësohet e qetë dhe nuk ka vend për asnjë shqetësim nga ana e qytetarëve”, thuhet në përgjigjen e Policisë.

 

Ndryshe përpos Prishtinës, masa të rrepta po zbatohen edhe në veri të Mitrovicës, ku që nga mëngjesi i sotëm, pjesëtarët e Policisë së Kosovës janë duke bërë kontrolle të rrepta për automjetet që hyjnë në zonën e Qendrës Spitalore në Mitrovicën e Veriut.

Zëvendësdrejtori i Policisë së Kosovës për Rajonin e Veriut, Besim Hoti, ka thënë për Reporterin se një aksion është duke u zhvilluar në të gjithë Kosovën, pasi një person nga Prishtina kërcënoi me sulme në spitalet e Kosovës.