×
  • Lajme
  • Lajme

    Një javë nga vrasja e trefishtë në Gllogjan, autori e motivi ende mister për organet e rendit

    Reporteri
    04 Dhjetor 2021 | 22:23

    Sot janë bërë tetë ditë nga tragjedia e Gllogjanit që tronditi Kosovën. Tre të vrarë, në mesin e tyre dy nxënës, ishte bilanci tragjik pasditen e të premtes së javës së kaluar kur persona të panjohur kanë shkrepur plumba në drejtim të autobusit të kompanisë “Erblini Tours”.

    Pavarësisht mobilizimit të madh dhe premtimeve të fuqishme nga institucionet e drejtësisë për kapjen e autorit, ende nuk ka asnjë të arrestuar për këtë rast.

    Madje deri më tani Policia e Kosovës nuk ka konfirmuar që ka edhe të dyshuar për këtë akt.

    Ministri i Punëve të Brendshme, Xhelal Sveçla në deklarimin e fundit për këtë rast i kishte bërë thirrje dorasit që të dorëzohet.

    Ndërkaq, drejtori i Policisë së Kosovës, Samedin Mehmeti kishte thënë se moti i ligë i ka penguar për gjetjen e gjurmëve për këtë rast.

    “Jemi duke u përballur me një numër të konsiderueshëm të informacioneve rreth rastit dhe kemi sjell njësi shtesë dhe ekspertë të ndryshëm të niveleve hetimore dhe operative” kishte thënë Mehmeti në një prononcim para mediave.

    Për kapjen sa më të shpejt të autorit, Qeveria e Kosovës ka ofruar para pak ditësh 20 mijë euro për personin që jep informacione.

    Tri viktimave, të dielën iu dha lamtumira e fundit. Dy nxënësit u varrosën në varrezat e fshatit Gllogjan, ndërsa shoferi u varros në Skivjan të Gjakovës.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!