Pas Qeverisë, edhe Kuvendi redukton shpenzimet e telefonisë dhe reprezentacionit për stafin politik dhe civil

Kryetarja e Kuvendit ka ndjekur një shembull qeveritar sa i përket shpenzimeve të telefonisë mobile, fikse dhe reprezentacionit. Ditë më parë, Qeveria Kurti zvogëloi këto shpenzime dhe sot të njëjtën e bëri edhe Kuvendi, me propozimin e Kryetares Osmani, shkruan Reporteri.


Në komunikatën e dërguar, thuhet se Kryesia e Kuvendit të Republikës së Kosovës, me iniciativën e kryetares Osmani, miratoi vendimin për reduktimin e shpenzimeve të telefonisë mobile, asaj fikse dhe reprezentacionit, si për stafin politik, ashtu edhe për administratën e Kuvendit. Në komunikatë nuk janë dhënë detaje se sa është ky zvogëlim në total.

Po ashtu, sipas komunikatës, Kryesia njëzëri miratoi Rregulloren për rendin dhe qasjen e mediave dhe të publikut në punën e Kuvendit, e hartuar në koordinim me përfaqësuesit e mediave dhe miratimit paraprak të Asociacionit të Gazetarëve të Kosovës (AGK), si dhe mbështetjen e NDI-së.

Gjithashtu thuhet se u miratua edhe raporti i shpenzimeve të Kuvendit për periudhën janar-mars 2020, konform rekomandimit të Komisionit për Buxhet dhe Transfere, ndërsa kërkesa e KOSTT-it për miratimin e Planit të biznesit të rishikuar dhe të buxhetit të rishikuar për vitin 2020, u procedua në Komisionin për Ekonomi, Punësim, Tregti, Industri, Ndërmarrësi dhe Investime Strategjike./Reporteri