Biznesmeni Latif Kryeziu, pronari i “AL Petrol ShPK” (Shell Kosova), mbrëmë ka kërcënuar drejtorin e gazetës online “Reporteri”, Bekim Kabashi dhe familjen e tij.
Drejtori i Reporterit, Bekim Kabashi mbrëmë rreth orës 20:00 ka denoncuar rastin në polici, përkatësisht tek Departamenti i Krimeve të Rënda i Policisë së Kosovës.
Mirëpo, gjatë ditës së sotme Policia e Kosovës ka tentuar të fshehë kërcënimin që është bërë ndaj Kabashit, duke mos e përfshirë fare rastin në raportin e tyre 24, orësh, pavarësisht se ky përbën kërcënim tejet të rrezikshëm për Kabashin dhe familjen e tij. Për më tepër denoncimi në Polici është bërë mbrëmë rreth orës 20:00.
“Bekimi ka vepru keq”, ka qenë porosia e biznesmenit Latif Kryeziut lënë për prindërit e Bekim Kabashit në shtëpinë e tyre në Rahovec.
Disa minuta pasi ka qëndruar në shtëpinë e drejtorit Kabashi, Kryeziu i ka shkruar në telefon drejtorit të Reporterit, përmes Whatsapp-it, duke përdorur edhe aty gjuhë kërcënuese ndaj tij dhe gazetës Reporteri.
“Mjer ju çka keni me përjetu”, i ka shkruar ai ndër tjera gazetarit Bekim Kabashi.
Kërcënimi ka ndodhur katër ditë pas publikimit të artikullit në Gazetën Online “Reporteri.net”, “Pikat e karburanteve SHELL Kosova nuk shesin derivate të gjigantit holandez ‘SHELL’“.
Rastin e ka dënuar edhe Asociacioni i Gazetarëve të Kosovës. AGK konsideron se ky rast është tejet serioz dhe përbën kërcënim të rrezikshëm për lirinë e medieve dhe integritetit fizik të gazetarëve.
“Për më tepër, për AGK është tejet shqetësuese dhe e papranueshme përfshirja dhe presioni ndaj familjes së gazetarit, për ç’gjë duhet të merren ugjentisht organet e rendit dhe drejtësisë”, thuhet ndër të tjera në reagim. /Reporteri.net