Policia e Kosovës (PK) njofton se është identifikuar një lokacion në fshatin Sadovinë e Çerkezëve në Viti, ku po mbaheshin kafshë të kontrabanduara.

Përmes njoftimit të policisë, thuhet se njësitë e Taskforcës nga Policia Kufitare – DRK Lindje, të martën kanë pranuar informacione se nga fshati Tanushë, dy automjete janë duke kontrabanduar disa kafshë.

“Pas informacioneve të pranuara nga njësitë kompetente policore janë ndërmarrë veprime të menjëhershme në terren, duke bërë vëzhgimin e rrugëve ilegale, përmes të cilave po kryhej veprimtaria e dyshuar, ku si rezultat rreth orës 20:00 në fshatin Sodovinë e Qerkezve – Viti është identifikuar lokacioni ku po vendoseshin kafshët e kontrabanduara, në pronën e të dyshuarit M. J. viti i lindjes 1991, i cili dyshohet se me të vërejtur njësitë policore është larguar në drejtim të panjohur”, thuhet në njoftim.

Tutje thuhet se në të njëjtin lokacion janë hasur dy automjete të dyshuara me targa vendore, ku pas kontrollit të tyre në njërin nga mjetet janë gjetur të ngarkuara tre krerë kafshë pa numër matrikulli, ndërsa në mjetin tjetër pavarësisht që ishte i zbrazur janë vërejtur gjurmë të bartjes së kafshëve.

“Po ashtu kontrolli është realizuar edhe në stallën e oborrit, me ç’rast janë gjetur 11 (njëmbëdhjetë) gjedhe dhe 1 (një) viç që të gjitha pa nr. matrikulli por me veshë të shpuara, ku dyshohet se numrat matrikulues të tyre janë hequr”, njofton Policia.

Sipas Policisë, lidhur me rastin është njoftuar prokurori kompetent, me urdhër të të cilit është iniciuar rasti “Kontrabandim me mallra”.

Po ashtu, bëhet e ditur se janë njoftuar edhe inspektorët e Agjencisë së Ushqimit dhe Veterinarisë, ku nga ta është lëshuar procesverbal mbi konfiskimin e kafshëve të cilat janë tërhequr dhe janë dërguar në Terminalin Doganor te Dheu i Bardhë.