I dërguari i ShBA-ve për Ballkanin Perëndimor, Gabriel Escobar, do ta takojë nesër të parin e Kuvendit të Kosovës, Glauk Konjufcën.
Në njoftimin për media, bëhet e ditur se ky takim pritet të zhvillohet me fillim nga ora 10:20, transmeton Reporteri.net.
“Kryetari i Kuvendit të Republikës së Kosovës, z. Glauk Konjufca, pret në takim Zëvendës Ndihmës Sekretarin e SHBA-së, z. Gabriel Escobar” thuhet në njoftim.
Para se të shkojë te Konjufca, Escobar fillimisht do të zhvillojë një takim me presidenten e vendit, Vjosa Osmani.
Në agjendën zyrtare të cilën e ka bërë publike Presidenca, takimi i Osmanit me Escobarit do të nisë në ora 09:00, derisa një orë më vonë pritet që të dy të deklarohen për media.
Publikohet agjenda: Osmani takon Escobarin nesër herët në mëngjes
Vizitën e tij në Prishtinë, Escobar do ta finalizojë me kryeministrin Albin Kurti.
Kryeministri Kurti, do ta presë emisarin amerikan në zyrë të tij në ora 11:00.
Në komunikatën e Kryeministrisë, nuk përmendet se Kurti dhe Escobar do të deklarohen për media.
Ndërkaq, mbrëmjen e së enjtes, emisari i ShBA-ve, Gabriel Escobar, zhvilloi një darkë me opozitën, nisur nga fakti se dy partitë opozitare, PDK dhe LDK, kanë shprehur rezerva lidhur me propozimin evropian.
Në këtë darkë, që u mbajt në rezidencën e ambasadorit amerikan, Jeffrey Hovenier, prezentë ishin Memli Krasniqi nga PDK, Lumir Abdixhiku nga LDK, dhe Ardian Gjini nga AAK, i cili e zëvendësoi liderin Haradinaj pasi ky i fundit gjendet jashtë shtetit.
Përfundon darka e Escobarit me opozitën, nuk ka deklarime për media
Escobar dje dhe sot qëndroi në Serbi, ku paraditen e së enjtes në konferencë për media foli edhe për takimin e 18 marsit në Ohër, teksa tha se nuk pret marrëveshje, por që ajo përfundimtare do të ndodhë brenda vitit.
I dërguari i posaçëm për Ballkanin Perëndimor tha se marrëveshja që tashmë ndodhet në tavolinë është një nga mundësitë më të mira për të çuar rajonin përpara.
Ndërsa, fakt si fakt të kryer e cilësoi formimin e Asociacionit të komunave me shumicë serbe, duke thënë se asociacioni do të bëhet, por çështja është se sa shpejt do të ndodhë kjo dhe cili model do të aplikohet. /Reporteri.net/.