Presidenti Ilir Meta ka dalë sot më herët se kurrë në zyrë. Kjo për t’u takuar me kreun e opozitës dhe të Qeverisë, por ky i fundit nuk është shprehur shumë optimist.

Ndonëse Meta i dërgoi ftesë Ramës duke i thënë se e pret në takim nga ora 05:00 e mëngjesit e deri në orën 13:00, Rama i tha se nuk ka kohë, shkruan Reporteri.net.

Rama, ndërkaq, ka takuar banorët e Njësisë Administrative Nr.4 në Tiranë, nga ku ka folur edhe për presidentin, i cili po e pret prej 6 orësh.

Sipas Ramës, opozita bashkë me presidentin nuk i kanë problem zgjedhjet por reformën në drejtësi e cila, siç tha Rama, është edhe frika e Presidentit Meta.

“Çfarë kam hequr unë me Presidentin për reformën në drejtësi.  Frikë e madhe, shqetësim i madh, hata e madhe…. Problemi nuk janë zgjedhjet, por ata janë tmerruar nga drejtësia”, theksoi Rama.

Sidoqoftë, kreu opozitar Lulzim Basha, i shkoi në zyrë presidentit Meta, i cili i kërkoi sjellje evropianë në këto ditë kritike për Shqipërinë.

Ndryshe, kur kanë mbetur edhe 3 ditë deri në zgjedhjet lokale, opozita vazhdon të kundërshtojë mbajtjen e tyre, ndërkohë që kryeministri Rama është shprehur i bindur se ato do të mbahen./Reporteri.net