Shqipëria ka shënuar viktimën e tretë me koronavirus.

Lajmi është konfirmuar nga Ministria e Shëndetësisë, e cila thotë se gjatë mbrëmjes së sotme (22 mars) ndërroi jetë një pacient i shtruar në spitalin Infektiv, i konfirmuar me COVID-19, por që vuante nga kanceri në mushkëri, në stad tejet të avancuar.

“71-vjeçari me origjinë nga Kuçova, i trajtuar më herët në spitalin universitar “Shefqet Ndroqi”, prej 7 ditësh ishte shtruar në spitalin Infektiv dhe gjatë mbrëmjes pati një komplikacion të menjëhershëm kardiak arterial.

71-vjeçari vuante nga disa sëmundje shoqëruese: Kancer mushkërie, diabet mellitus, fibrilacion arterial dhe hipertension”, thuhet në njoftimin e ministrisë së Shëndetësisë.

Duke i shprehur ngushëllime familjes së të ndjerit, ministria apelon dhe një herë qytetarët të respektojnë rregullat e distancimit social dhe të telefonojnë 127 në rast se kanë shenja të sëmundjes.