Kryetari i LDK-së Isa Mustafa ka thënë për Klan Kosova se këtë të mërkurë ose të enjte Lidhja Demokratike do të mbledhë organin e saj udhëheqës për t’i dhënë përgjigjie finale partnerit të koalicionit Albin Kurtit dhe Vetëvendosjes.
Kjo pasi Kryeministri Albin Kurti, shkarkoi sot nënkryetarin e LDK-së, Agim Veliun që deri sot ishte Ministër i Punëve të Brendshme.
Mustafa edhe njëherë sqaroi që asnjë sekond LDK nuk është konsultuar lidhur vendimin e dhënë sot nga Kurti dhe se kjo rrezikon partneritetin.
Ndërkohë, Mustafa u deklarua edhe në facebook, ku tregoi se shkarkimi ishte shkelje e marrëveshjes për koalicion.
“Kjo është shkelje e Marrëveshjes së koalicionit. Me marrëveshje kemi përcaktuar se ministrat mund të shkarkohen nga Kryeministri në konsultim me Kryetarin e subjektit politik me të cilin është bërë koalicioni, bazuar në një arsyetim që e pranon Kryetari i LDK-së”, tha më herët ai.
Edhe anëtari i Kryesisë së LDK-së, Skënder Hyseni, tha se kjo gjë cënon Qeverinë. Sipas tij, nuk përjashtohet mundësia për prishjen e koalicionit, shkruan Reporteri.net.