Sveçla: Thaçit duhet t’i bëhet një vlerësim psikiatrik

Kryetari i Komisionit Hetimor Parlamentar në lidhje me ndriçimin e rastit të dëbimit të gjashtë shtetasve turq më 29 mars 2018, Xhelal Sveçla, ka deklaruar se presidenti i Kosovës, Hashim Thaçi, “ka probleme të thella personale, psikiatrike”.


Këtë koment, Sveçla e ka bërë teksa ka folur për paraqitjen e Thaçit, në një mbledhje të komisionit që ai udhëheq, javë më parë.

Sveçla ka thënë në T7, se Thaçit duhet “t’i bëhet një vlerësim psikiatrik”, shkruan Express.

“Bazuar në Kushtetutë, është e drejtë e secilit institucion që të kërkojë këtë”, është shprehur Sveçla.

“Le të na bindë që është i aftë, që mund ta udhëheqë këtë vend. Kuvendi duhet ta marrë iniciativën për këtë gjë”, ka deklaruar ai, duke iu referuar vlerësimit psikiatrik për Thaçin.