Osmani: Kryeparlamentari, Kryeministri dhe Presidenti duhet të jenë shembuj të udhëheqësve të pakorruptuar

Nënkryetarja e LDK-së, Vjosa Osmani, e shoqëruar nga anëtari i Kryesisë, Besian Mustafa dhe Armend Zemaj, janë takuar me ambasadorin e Zvicrës në Kosovë, Jean-Huert Lebet.


Gjatë takimit Osmani e njoftoi Ambasadorin Lebet për diskutimet LDK-LVV drejt një programi të përbashkët në qeverinë ardhshme.

Poashtu, Osmani potencoi se prioritet i kësaj qeverie do të jetë alokimi i buxhetit drejt investimit në qytetarët e Kosovës veçanërisht në arsim, shëndetësi dhe rritje të punësimit të rinisë dhe grave.

“Të gjitha këto arrihen vetëm nëse fillimisht garantohet sundimi i ligjit dhe lufta kundër krimit e korrupsionit ku krerët e shtetit, Kryeparlamentari, Kryeministri dhe Presidenti duhet të jenë vet shembuj të udhëheqësve të pakorruptuar”, thuhet në njoftimin e LDK-së.

Në njoftim më tej thuhet se ambasadori Lebet falënderoi LDK-në për qasjen konstruktive në proceset shtetformuese dhe ofroi përkrahjen e shtetit të Zvicrës në procesin e dialogut Kosovë-Serbi, të facilituar nga Bashkimi Evropian. /Reporteri.net/.