Adelina Ismaili ka munguar sërish në gjykatë si dëshmitare në vrasjen e Triumf Rizës në gjykimin që po zhvillohet ndaj Enver Sekiraqës.

Këngëtarja së bashku me dy motrat e saj, Zanfinën dhe Emën nuk janë paraqitur as ditën e sotme në gjykimin ndaj Sekiraqës, shkruan Gazeta Online Reporteri.net.

Gjykatësi Agim Kuçi ka njoftuar se dëshmitaret Adelina, Zanfina dhe Ema Ismaili mungesën e kanë arsyetuar përmes përfaqësuesit të tyre, avokatit Alban Makolli. Ky i fundit, përmes një parashtrese, ka njoftuar se motrat Ismaili nuk gjenden në Kosovë dhe se nuk dihet kur do të kthehen.

Por, sa është e vërtetë që Adelina nuk ndodhet në Kosovë?

Dyshimet e para janë hedhur se kjo gjë nuk është plotësisht e vërtetë!

Një klinikë në Prishtinë, e cila merret me trajtimin e fytyrës, vetëm 13 orë më parë ka publikuar një fotografi të Adelina Ismailit duke kryer tretman pranë tyre, duke hedhur poshtë atë që avokati i saj ka thënë.

“Për sigurimin e pranisë së tyre në seancën e radhës, do të lëshohet urdhëresë për sjelljen e tyre nga ana e policisë. Me këtë rast do ta marrim edhe konfirmimin zyrtar nëse gjenden ose jo jashtë vendit”, ka thënë gjykatësi Kuqi. Seanca e radhës pritet të mbahet më 25 janar 2022.