Banka e Shqipërisë: 88% e shqiptarëve nuk blejnë dot shtëpi, ruajnë kursimet

Çmimet e apartamenteve në disa zona të Tiranës arrijnë deri në 1900 euro/m2. Kjo rritje e shpejtë e tyre e rendit Tiranën ndër kryeqytetet më të shtrenjta të rajonit.


Por në raport me të ardhurat, pjesa më e madhe e shqiptarëve deklarojnë se nuk kanë mundësi që të blejnë shtëpi. Në pyetësorin e fundit të Bankës së Shqipërisë, 88 nga 100 persona thanë se e kanë potencialisht të pamundur të blejnë apo ndërtojnë një banesë të re.

Përgjigja e të anketuarve të përzgjedhur rastësisht, del mes 4 alternativave opsionale. Bazuar në shifra, gjatë dy viteve të fundit mundësia për investime madhore është ulur, dhe shkak është bërë pandemia, e cila lëkundi ekonominë me kufizimet që krijoi.

Realiteti për kursim dhe pasiguri nuk shfaqet vetëm tek shpenzimet madhore, por edhe te blerjet e vogla. Banka e Shqipërisë mat besimin e konsumatorëve me 15 pyetje, ku përfshihet vlerësimi i situatës financiare, siguria në punë apo rinovimi i banesës e blerja e një makine.

Përgjigjet në shumicën e rasteve demonstrojnë kufizime, megjithatë në krahasim me vitin 2020 në disa prej përgjigjeve shfaqen shenja optimizmi.

Çmimet e apartamenteve në rajon, qershor 2021

Qyteti  Periferi  Qendër

Tirana  770  1900

Beograd  1400  2600

Shkup  900  1300

Athinë  1670  1700

Podgoricë  1100  1500

Sarajevë  1000  1600

Prishtinë  750  1000

Burimi: Numbeo

Sondazhi për blerje banese në vite

-86 –    84 –     87 –      86 –     89 –     88

2016   2017   2018   2019   2020   2021

Burimi: Banka e Shqipërisë