Mesazhet e koduara mafioze, 11 makina të djegura brenda 3 muajsh në Shqipëri

Dy automjete u dogjën këtë javë në Vlorë, duke e çuar në katër numrin e ngjarjeve dhe në 11 atë të makinave të shkrumbuara vetëm për tre muajt e parë të këtij viti.


Së bashku me shpërthimet me tritol pa pasoja në njerëz konsiderohen si atentate paralajmëruese në Vlorë.

Në 2 vitet e fundit janë shënuar 23 të tilla, ku për pasojë dy persona kanë mbetur të plagosur rëndë.

Por në asnjë rast hetimi nuk ka përfunduar me autorë të arrestuar.

Policia e Vlorës nuk ka hetues të specializuar në këtë fushë ndërsa pengesë është edhe fakti se laboratori i vetëm për gjurmë daktiloskopike ndodhet në Tiranë, shkruan ora news.

Nga ana tjetër, as objektivët e këtyre sulmeve nuk tregohen bashkëpunues.

Hetuesit argumentojnë se djegia e makinave apo vendosja e tritolit janë mesazhe të koduara që lënë pak gjurmë dhe nuk mund të zbardhen pa bashkëpunim.