Përfundon mbledhja e Bashës me aleatët opozitarë: Zgjati një orë, çfarë u diskutua

Ka zgjatur një orë takimi në selinë blu mes kryetarit të PD Lulzim Bashës dhe aleatëve të tij, çështja politike aktuale me mosdakordësinë mbi ndryshimet në kodin zgjedhor ka qenë tema e diskutimit. Palët pozitë-opozitë nuk kanë rënë dakord për ndryshimet kushtetuese, me opozitën që thotë se këto ndryshime nuk kanë pasur konsensus dhe nuk i janë përmbajtur marrëveshjes së 5 qershorit.


Ndërsa maxhoranca kërkon që opozita të paraqesë një draft zyrtar për t’u diskutuar në tryezën e Këshillit politik.

Kur kanë mbetur vetëm 8 ditë kohë për të mbyllur procesin dhe ndryshimet kushtetuese të miratohen në parlament, opozita i ka dërguar një letër ODIHR ku kërkon opinion mbi ndryshimet që propozohen. Maxhoranca ka propozuar lista të hapura 100%, preferenciale, ndalimin e koalicioneve parazgjedhore por lejimin e atyre me listë të përbashkët, si dhe prag zgjedhor 3%.

Ndërsa opozita insiston që koalicionet të mos preken, me pretendimin se po prishet modeli tradicional i sistemit zgjedhor në Shqipëri.

Nëse opozita nuk dakordësohet me palët në tryezë, përfaqësuesi i PS në Këshillin Politik Damian Gjiknuri ka paralajmëruar se mazhoranca nuk do të lejoj vakum kushtetues dhe se do të vijojnë me reflektimin e ndryshimeve në Kodin Zgjedhor pa ta.

Vetë kryedemokrati nuk doli për mediat të tregojë më shumë detaje nga mbledhja, të shtrojë propozim apo draftin zyrtar që kërkon maxhoranca.