Detaje të reja kanë dalë në dritë në lidhje me motrat, Zhaneta Metani dhe Kristina Bardhi, të cilat u ekzekutuan me kallashnikov mëngjesin e ditës së fundit të vitit 2020, nga Përparim Ademi.

Burime për “Fax” bëjnë me dije se autoritetet greke kanë nisur hetimet, dhe se deri më tani dyshohet se në rrjetin e trafikut të fëmijëve nga dy motrat dhe Ademi, ishte i përfshirë edhe një avokat nga Tirana, i cili është zhdukur pa lënë gjurmë, 19 ditë para vrasjes së dyfshitë që tronditi vendin.

Ndërkohë që është zbuluar se Ademi bënte vetëm shitjen e fëmijëve të mitur, ndërsa mbetet e paqartë kush i linte shtatzënë dy motrat. Gjithashtu nga autoritetet greke është mësuar se motrat qëndruan për 7 vite në qytetin e Selanikut (1990-1997) dhe më pas u larguan për tek motra tjetër në Kavala, por nuk i shpëtuan Përparim Ademit. Shoqja e tyre ka treguar se ai i kishte përndjekur edhe në Greqi me armë zjarri, dhe se ato kishin shpëtuar vetëm duke u hedhur nga dritarja.

Me fotografitë e tyre në duar, Policia greke ka bërë një “vizitë” edhe në një nga qendrat e prostitucionit në vend, ku njëra prej punonjësve të seksit ka pohuar se i njihte motrat dhe se kishte dijeni lidhur me trafikimin e fëmijëve. Prokuroria greke dyshon se Selaniku ka qenë qendra e shitblerjes të së sapolindurve, ku mendohet të jenë 50 familje që shesin fëmijë.

Dy motrat u vranë mesditën e 31 dhjetorit nga Përparim Ademi me automatik brenda shtëpisë së tyre në periferi të Tiranës. Pas ekzekutimit të dy motrave, Ademi u kap nga policia, ndërsa tha para bluve se ishte duke shkuar të dorëzohej. Në daljet e tyre në media, të afërmit e motrave të vrara deklaruan se Ademi i shfrytëzonte ato për prostitucion, ndërsa gjatë viteve të fundit kishin lindur 10 fëmijë, të cilët ishin shitur në Greqi. Pas këtyre deklaratave, autoritetet greke nisën hetimet.