Ballkani publikon projektin e madh për kompleks të ri sportiv

Presidenti i Ballkanit, Arsim Kabashi, e ka publikuar në llogarinë e tij në Facebook një video për ta treguar projektin e madh të Ballkanit për ndërtimin e një kompleksi sportiv.


Klubi nga Suhareka, Ballkani, ka qenë mbresëlënës në këtë sezon të Ipko Superligës së Kosovës, ku ka arritur ta marrë vendin e parë deri në momentin kur u ndërpre sezoni shkaku i koronavirusit, transmeton Gazeta Express.

Ballkani ka arritur edhe në gjysmëfinale të Kupës së Kosovës, përderisa sezonin e kaluar kishte qenë pjesë e luftës për mbijetesë, por kishte shpëtuar duke përfunduar në pozitën e tetë.

Por, presidenti i klubit nga Suhareka, Arsim Kabashi, dëshiron të sigurohet që suksesi i Ballkanit të zgjasë edhe në sezonet e ardhshme. Për ta bërë këtë, ai planifikon ta ndërtojë një kompleks të ri sportiv.

“Kompleksi Sportiv FC Ballkani. Projekti konceptual, së shpejti inaugurimi… e ku ka më mirë se në vendlindje”, shkroi Kababashi, mbi videon e publikuar në Facebook.

“Na Priftë e mbara”.

Këtë video e shpërndau edhe trajneri i Ballkanit, Ismet Munishi në llogarinë e tij në Facebook.

“Për hair ma i miri dhe ma i madhi President . Gur mbi gurë edhe ne futboll”, shkroi Munishi.