Ismet Krasniqi, kryetari i sapozgjedhur i Komitetit Olimpik të Kosovës, të mërkurën do ta merr zyrtarisht pozitën e re, të cilën e fitoi në Asamblenë Zgjedhore të KOK-ut. Në këtë garë ai mposhti Besim Hasanin e Linda Shalën duke fituar 53 vota nga gjithsej 105 delegatë me të drejtë vote.
Krasniqi ka treguar se ka një ditë pasi të bëhet zyrtarisht kryetar i KOK-ut ka thirrur një mbledhje.
“Menjëherë të enjten e kemi mbledhjen e parë konstituive të Bordit Ekzekutiv, ku njëra ndër pikat e shumta të Rendit të Ditës janë edhe zgjedhja e Komisioneve të KOK-ut” tha Krasniqi për Reporteri.net.
Por, Krasniqi ka treguar se ndër punët e para të tij do të jetë ndryshimi i Statutit të KOK-ut duke sqaruar çështjen e regjistrimit dhe licencat e federatave të ndryshme në vend.
“Është e vërtetë që ka pasur kritika dhe këto u shfaqen edhe në Asamblenë e Punës dhe Asamblenë Zgjedhore. Gjatë mandatit tim, bashkërisht me Ministrinë për Kulturë Rini e Sport do të mundohemi që njëherë e mirë të sqarojmë këtë çështje dhe të mos vijmë më në situata të tilla. Besoj se këtë do ta sqarojmë edhe me hartimin e statutit të ri’’, deklaroi Krasniqi të martën për Reporteri.net, një ditë para se ta marrë zyrtarisht detyrën e të parit të Komitetit Olimpik të Kosovës.
Në një intervistë për Gazetën Online ‘Reporteri.net’, Krasniqi ka folur edhe për marrëdhëniet me Besim Hasanin, ish-kryetarin që udhëhoqi për 25 vite KOK-un, duke thënë se ka patur gjithmonë marrëdhënie të mira me të, por se është koha për ndryshime.