Përfaqësuesja e Kosovës në basketboll i ka nisur të hënën përgatitjet për ndeshjet e para të parakualifikimeve për Botërorin e vitit 2023.
Në kuadër të Grupit B të raundit të parë parakualifikues, Kosova të enjten (19:00) luan ndaj Islandës. Kjo ndeshje luhet në Pallatin e Rinisë në Prishtinë. Të dielën Kosova luan në udhëtim ndaj Luksemburgut. Në grup me Kosovën është edhe Sllovakia.
Përzgjedhësi i ri i Kosovës, greku Christos Marmarinos të hënën paradite ka mbajtur stërvitjen e parë.
“Kemi filluar mirë stërvitjet dhe do të mundohemi të përgatitemi sa më mirë, pasi nuk kemi shumë kohë. Synimet janë që të fitojmë. Atmosfera në ekip është shumë e mirë. 17 Shkurti është ditë e rëndësishme për Kosovën. Është e rëndësishme që lojtarët që bartin fanellën e Kosovës të përfaqësojnë sa më mirë shtetin në garat ndërkombëtare”, ka thënë Marmarinos për sajtin e FBK-së.